२०८१ फाल्गुण ६, मंगलबार

उद्यमशीलतापाखें रोजगारी सिर्जना यायेगु थौंकन्हय्या आवश्यकता : सभापति देउवा

लहनान्युज | पोहेलागा आमै ११४५, माघ १६ बुधवाः

नेपाली कांग्रेसया सभापति नापं पूर्वप्रधानमन्त्री शेरबहादुर देउवां गां गामय् स्थानीय उद्यमशीलताया विकास यानाः आत्मनिर्भरता व रोजगारी सिर्जना यायेगु थौंकन्हय्या आवश्यकता जूगु धयादीगु दु।

कांग्रेसया उद्यमशीलता व चीधंगु नापं मध्यम व्यवसायी विकास विभागं थौं थन ग्वसाःग्वःगु ‘नेपाल स्टार्ट अप व चीधंगु नापं मध्यम बनेज्या सम्मेलन’या उलेज्या समारोहय् वय्कलं गामं निसें लजगाया विकास जुया वनीगु इलय् चीधंगु लगानीपाखें हे रोजगारी व आत्मनिर्भरताय् ग्वाहालि जुइगु खँ न्ह्यथनादिल।

“लिपांगु इलय् ‘स्टार्ट अप’ ब्यवसाय पाखे आकर्षण अप्वयावंगु दु, युवा पुस्तां म्ह्वः लगानी यानाः नं सिर्जनात्मक ढङ्गं ज्या यायेगु कुतः यानाच्वंगु दु, थजाःगु लजगा सञ्चालन यायेत सहुलियतपूर्ण ऋण, तालिम, सीप विकास व विशेष अनुदान बिइगु नं आवश्यक जू”, सभापति देउवां धयादिल, “बनेज्याय् टिके जुइत लजगामितय्सं धैर्य जुयाः मद्दिक ज्या यानाच्वनेमाःगुलिं सरकारया साथ, समर्थन व संरक्षकत्व मदयेक मगाः, म्ह्वः लगानीपाखें हे ‘स्टार्ट अप’ बनेज्यायात प्रभावकारी जुइक सञ्चालन यायेगु खःसा रोजगारीइ क्रान्ति हये नं फइ।” थ्व नापं  बहुसम्भावनाया ख्यः कृषि, वन, जडीबुटी, पर्यटन, प्रविधिथेंजाःगु ख्यःया समुचित विकासय् विशेष ध्यान बिइफःसा देय्या आर्थिक अवस्था थकायेत तःधंगु तिबः जुइगु वय्कःया धापू दु ।

वय्कलं धयादिल, “लजगामि, बन्जाः, व्यवसायीतय्सं फयेमाःगु कानुनी नापं प्रक्रियागत कचवं ज्यंकाः बनेज्याय् सहजीकरण यायेत नकतिनि धइथें सरकारं कानुन हःगु दु, थ्व कानुनं थुगु ख्यःया सुधारय् आवश्यक ग्वाहालि बिइगु भलसा कयागु दु।”देय्या समुन्नतिया निंतिं राज्यया ध्यान वनेमाःगु मेगु विषय सुचं प्रविधि जूगु धयादिसें सभापति देउवां थुगु दक्व ज्या यायेत राजनीतिक स्थिरतालिसें प्राकृतिक स्रोत, मानव संशाधन, पुँजी व प्रविधिया सन्तुलित व समन्वयात्मक विकास जुइमाःगुलिइ बः बियादिल ।

“थन जुइगु थी थी नवीनतम उत्पादन, सेवातय्गु प्रदर्शनीं स्थानीय उद्यमशीलतायात हःपा बियाः लगानीकर्तातय्त नं ह्वःताःया निंतिं प्रेरणा दइ, बेरोजगारी समस्याय् लानाच्वंपिं युवा पुचः तय्त स्वरोजगारया न्हूगु लुखा चाली”, सभापति देउवां धयादिल, “नवप्रवर्तन व उद्यमशीलताया माध्यमं विश्वव्यापी मन्दीया मारय् लाःगु देय्या आर्थिक अवस्थाय् सुधार हयेततकं तिबः जुइगु जिगु भलसा दु।” वय्कलं थुगु सम्मेलनया सहलहपाखें वःगु लिच्वलं छगू कार्ययोजनाया थासा दयेकेत पार्टीयात जक मखु सरकारयात नं लँपु क्यनीगु अपेक्षा यानादिल।

“सम्मेलनया लिच्वलं प्रतिवेदन व सफू तयार यायेगु, उद्यमशीलता व आर्थिक वृद्धिइ योगदान बिइपिं युवातय्गु नेटवर्क निर्माण, नीतिगत सुधार व प्रदर्शनीपाखें स्थानीय उत्पादनयात च्वयेकेगु नापं बिक्री अप्वकेगु लिसेंया गुगु आज्जु तयातःगु खः, सकसिगु नं कुतलं अपेक्षित लिच्वः काये हे फइ”, वय्कलं धयादिल। सम्मेलन थौं व बिहीबार पार्टीया केन्द्रीय ज्याकुथि सानेपाय् जुइ। मूकथं छुं याये धइगु भावना दुपिं युवा व मिसातय्गु समुदायया लजगायात हःपा बिइत गजाःगु नीति निर्माण दयेकेगु धइगु विषयकय् सम्मेलनय् सहलह जुइगु धयादीगु दु। सम्मेलनय् थी थी ख्यलं स्यंगु अनुभव व बिचाःपाखें थवंथः ज्ञांया प्रवाह जुइगु ग्वसाः खलःया धापू दु।

Categorized in राजनीति