प्रतिनिधिसभाया न्याक्वःगु अधिवेशन न्ह्याःगु झ्वलय् प्रधानमन्त्री केपी शर्मा ओलीं मुँज्यायात संबोधन यानादिसें विकास निर्माणय् न्ह्यानाच्वंगु ज्याय् प्रगति जुयाच्वंगु दु धकाः धयादीगु दु।

वय्कलं मुलुकयात समृद्ध यायेत न्ह्याकूगु विकास निर्माणया ज्या पूवंकेगु ताःतयाः सरकार न्ह्यानाच्वंगु धयादिसें महत्वपूर्ण आयोजना तय्गु प्रगति न्ह्यब्वयादिल। प्रधानमन्त्री ओलीं नकतिनि हे सिद्धबाबा सुुरुङमार्गया ‘ब्रेक थ्रुु’ छगू उपलब्धि जूगु न्ह्यथनादिसें सतक यात्राया असुरक्षा म्ह्वः यायेत व पूर्वाधारयात क्वातुकाः यंकेत सुरुङ मार्गया योजना न्ह्यानाच्वंगु धयादिल।

वय्कलं येँ–तराई मधेश द्रुतमार्ग दुने मकवानपुरया धेद्रे सुरुङ व चीन व भारतयात स्वाइगु राष्ट्रिय गौरवया आयोजना जोगवनी–किमाथाङ्का सतकमार्गलिसें छन्हुनिन्हु न्ह्यः जक ‘ब्रेक थ्रु’ जूगु खँ कनादिल। प्रधानमन्त्री ओलीं ठेक्का काःगु कम्पनीं ज्या त्वःते धुंकाः बुटवल–नारायणगढ ब्वया सतक निर्माणया ज्या द्रुतगतिइ न्ह्यानाच्वंगु धयादिल।

वय्कलं मन्त्रिपरिषद्या न्हापांगु मुँज्यां किपूया क्रिकेट ख्यःयात रङ्गशाला दयेकेगु व उकिइ फ्लडलाइट तयेगु निर्णयकथं बोलपत्र आह्वान जुयाः क्वछिनातःगु इलय् हे उकियात क्वचायेकेगु कथं ज्या न्ह्यानाच्वंगु धयादिल। “अथे हे, सुर्खेतय् आधुनिक कर्णाली रङ्गशाला तयार जुइ धुंकूगु दु।

विकास निर्माणया ज्याय् ‘ब्रेक–थ्रु’ जक मखु ‘ब्रेक’ यानातःगु गुलिखे ज्यात नं जिपिं वयेधुंकाः न्ह्याकागु दु”, प्रधानमन्त्री ओलीं संबोधन यायेगु झ्वलय् धयादिल।

Categorized in राष्ट्रिय