खोखो विश्वकपय् नेपाःया इतिहास
प्रजित शाक्य | सिल्लाथ्व चौथी ११४५, माघ २० आईतवाः

नेपाःया खोखो टिमं वंगु वालय् अनपेक्षित रुपय् नेपाःमि खेलप्रेमीयात खुशी बिल । अपेक्षा याःगु स्वयां आशा मयाःगु इलय् चूलाःगु सफलतां आपालं खुशी बी। नेपालं खोखो विश्वकपया फाइनल हे म्हिते धुंकाः नेपाःमि खेलप्रेमीं अज्याःगु हे अनुभव यात। अझ नेपाःया मिजं व मिसा निगुलिं टिमं विश्वकपया फाइनल कासा म्हितुगु खः। खोखो विश्वकपया फाइनलय् धाःसा नेपाःया निगुलिं पुचः पराजित जुल।
विश्वकप थेंज्याःगु प्रतियोगिताया लिपांगु भिडन्तय् बूगु पिडाया मापन शायद हे याय्फइ। थप छगू कासा त्याःगु जूसा नेपाः विश्व विजेता जुइगु खः। तर नेपाःया मिजं व मिसा पुचः ग्वसाः खलः भारत लिसे खोखो विश्वकपया उपाधि तंकेमाःसां नं लय्ताःगु हे खनेदु। सन्तुष्ट दु। नेपालं गुगुं नं स्तरया विश्वकपया फाइनल म्हितूगु न्हापांखुसी खः। अथेजुयाः टिम गेमय् नेपाःया खेलकुदया नितिं थ्व तःधंगु उपलब्धि जुल। भारतया न्हू दिल्लीस्थित इन्दिरा गान्धी इन्दोर स्टेडियमय् जूगु खोखो विश्वकपया न्हापांगु संस्करणय् भारतं मिजं व मिसा निगुलिं वर्गय् नेपाःयात उपाधि भिडन्तय् बुकल। मिसा फाइनलय् आयोजक भारतं नेपाःयात ७८–४० बुलक।
उकथं हे मिजं फाइनलय् भारतं नेपाःयात ५४–३६ बुकल। भारत निगुलिं वर्गय् खोखो विश्वकपया न्हापांगु च्याम्पियन जुल। विश्वकप उपविजेताया उपलब्धिइ नेपाःया खोखो टिम जक मखु, विश्वया हे प्रतिष्ठित खेल च्यानल स्टार स्पोर्ट्सं प्रत्यक्ष प्रसारण स्वःपिं लाखौँ नेपाःमि खेलप्रेमीं थःगु टिम बूगुलिं नं गर्व यात। खोखो कासाय् ग्वसाः खलः भारतया यकःति दबदबा दु। खोखो भारतया मौलिक कासा खः। थुगु कासायात विश्वव्यापी दय्केत भारतं थुगु कासाया नियमत परिवर्तन यासें आपालं खर्च नं याःगु दु। खोखोय् भारतया स्तर विश्वया मेगु टिमया स्वयां च्वय् लाः।
अथे जुयाः नं खोखो विश्वकपय् ब्वति काःपिं मेगु टिमया आज्जु उपाधि स्वयां फाइनल म्हितेगु खः। गुकी नेपाःया मिजं व मिसा निगुलिं टिम सफल जूगु ताय्केमाः। नेपाःया मिजं व मिसा टिमं नेपालं नं खोखो विश्वकपया न्हापांगु संस्करणय् हे फाइनल म्हिताः थःत इतिहासया पानाय् दुथ्याकूगु दु। खोखो विश्वकपया न्हापांगु संस्करणय् मिजं पाखे २० व मिसापाखे १९ टिमं ब्वति काःगु खः। नेपाःया मिसा टिम अपराजित जुयाः भारतलिसे फाइनल म्हितूगु खः। नेपालं फाइनलया यात्रा याय्गु झ्वलय् सेमिफाइनलय् युगान्डा, क्वाटरफाइनलय् इरान व समूह चरणय् भुटान, जर्मनी, श्रीलङका व बङगलादेशयात अपुक बुकूगु खः।मिजं फाइनलय् धाःसा मध्यान्तर तक नेपालं भारतयात हाथ्या बिउगु खः। नेपालं प्यंगूगु र्टनय् अविश्वसनीय प्रदर्शन यानाः विश्व विजेता जुइगु नेपालयाके गणितीय समीकरण कायम दुगु खः।
तर नेपालं हिले धाःसा मफुत। विश्वकपया उद्घाटन न्हिं भारत लिसे नेपाः ४२–३७ या म्हो अन्तरं बूगु खः। लिपांगु न्हिं च्याम्पियनसीप कासाय् बूगु बदला काय्गु नेपाःयाके ह्वःता दुगु खः। तर नेपालं भारतयात स्तब्ध याय्मफुत। भारत लिसे न्हापांंगु कासय् बुइवं नेपालं समूह चरणय् पेरु, ब्राजिल, भुटान लिसे क्वाटरफाइनलय् बङ्गलादेश व सेमिफाइनलय् इरानयात बुकाः फाइनलय् थाय् दय्कूगु खः। अन्तय् खोखो नेपाःया नं परम्परागत कासा खः। राष्ट्रिय खेलकुदय् नं खोखो नियमित रुपय् दुथ्याकेगु यानाच्वंगु दु। अथे खःसां नं थुगु कासा उपेक्षित हे जू।
भारतय् विश्वकप म्हितेत वंगु इलय् नं खोखो टिम बारे छुं हल्ला मजू। विश्वकपय् मिजं व मिसा निगुलिं पुचलं रजत त्याकेधुंकाः जक नेपालय् खोखो टिमया बारे चर्चा जूगु खः। आः धाःसा सरकार व सरोकारवालां नेपालय् खोखोयात लोकप्रिय दय्केत थुगु कासाय् लगानी याय्माःगु दु। छाय्धाःसा विश्वया दकलय् तःधंगु खेलकुद मेला ओलम्पिकय् पदक हय्फइगु कासा खोखो जूगु दु। खय्त ला खोखो ओलम्पिक कासा मखु। तर भारतं खोखोयात ओलम्पिकय् दुथ्याकेगु कुतः यानाच्वंगु दु। अथेजुयाः भारत थुगु लक्ष्यय् सफल जुलधाःसा खोखो नेपाःयात ओलम्पिकय् पदक हय्फइगु कासा नं जुइफु धकाः धाःसा पाइ मखु। छाय्धाःसा थुगु विश्वकपं नेपाः खोखोय् विश्वया निगूगु उत्कृष्ट टिम सावित जुइधुंकूगु दु।
इतिहास दय्कूगुपिं नेपाःया खोखो कासामि मिजं टिम :
हेमराज पनेरू (कप्तान), जनक चन्द, समीर चन्द, विश्वास चौधरी, सुरज पुजारा, रोहितकुमार वर्मा, यमन पुरी, वेदबहादुर वली, झलक विक, विकरालसिंह रत्गैया, विशाल थारू, राजन बल, जोगेन्द्र राना, भरत सारू व गणेश विश्वकर्मा।
मिसा टिम : सरस्वती कडायत (कप्तान), मानमती धामी, पूजा ओड, आशा थारू, दीपा विक, निशा शाही, कर्माकुमारी शाही, कञ्चन चौधरी, पुनम, थारू, सम्झना विक, दीपाकुमारी विक, खुश्बु राना, वर्षा पण्डित, गीता चौधरी व अनिशा गोले।