भ्रष्टाचारय् नागरिकं च्यूता कायेमाल
नृपेन्द्रलाल श्रेष्ठ | सिल्लाथ्व पंचमी ११४५, माघ २१ सोमवाः

राजनीतिक पार्टीत भ्रष्टाचार जुल धाःसा नागरिक निराश जुइ। अवश्य नं राजनीतिक पार्टी स्यनाच्वंगुया दोषी राजनीतिक पार्टीइ दुपिं व्यक्तिपिं जक मखु, उकिया निंतिं जनता नं जिम्मेवार जुइ। थुकीं नागरिकं थःगु भूमिका ल्वःमंकल धाःसा राजनीतिक पार्टीइ मू नेतात निरंकुश जुइ।
राजनीतिक दलतय्सं याइगु भ्रष्टाचारयात नियन्त्रण याय्त नागरिकयात भ्रष्टाचारया बारे बांलाक जानकारी बीमाः, मेपिंत नं थुकिया बिइमाः। सञ्चार माध्यम, सामाजिक सञ्जाल, जनचेतना अभियानपाखें न भ्रष्टाचारया विषय खँ ल्ह्वलनेमाः ।थथे लोकतान्त्रिक अधिकार नं छ्यलेमाः ।स्वतन्त्र व निष्पक्ष निर्वाचनपाखें योग्य व इमान्दार उम्मेदवार ल्यय्गु नागरिकया अधिकार खः। तर थन छुं छुं सीमित राजनीतिक दलतय्सं अप्वः धइथें क्षेत्रय् थःगु पकड कायम यानाच्वंगु दु।
थुकिया लिच्वः कथं नेपालय् निष्पक्ष नेपाली नागरिकया ल्याः स्वयां अप्वः कार्यकर्तातय्गु ल्याः अप्वःगु दु । मजदुरत देय् स्वयां पार्टीप्रति अप्वः जिम्मेवार जुइगु प्रवृत्ति दु। थुकिं यानाः राजनीतिक पार्टीत धमाधम निरंकुश जुजुं वनाच्वंगु धारणा अप्वयावनाच्वंगु। थज्याःगु प्रवृत्ति लोकतन्त्रया निंतिं घातक खः। भ्रष्टाचारी नेतातय्त अस्वीकार याय्त संगठन याय्गु, प्रदर्शन याय्गु, अभियान न्ह्याकेगु नागरिकया कर्तव्य जूसां नं अज्याःगु कारवाही धाःसा जूगु मदुनि। अथे हे थन सुचंया अधिकार नं म्हो जक छ्यलाबुला जुयाच्वंगु दु। नागरिकं कानूनी प्रक्रियापाखें पारदर्शिता सुनिश्चित याय् फयाच्वंगु मदु।
भ्रष्टाचारय् दुथ्याःपिंत नागरिक समाजं कानूनी उजुरी तये फयाच्वंगु मदुनि। भ्रष्टाचार निमूल आयोग वा सम्बन्धित निकायय् मुद्दा यंकाः न्याय माग याय्गु सम्भव जूगु मदुनि। छाय्धाःसा भ्रष्टाचार अनुसन्धान निकायया प्रमुख धइम्ह राजनीतिक दलं नियुक्त याइम्ह प्रतिनिधि खः । अथे हे नेपालय् नं न्हूगु राजनीतिक दल वा स्वतन्त्र उम्मेदवारयात समर्थन यानाः परम्परागत भ्रष्ट दलतय्त हाथ्या बीगु कुतः जुयाच्वंगुलि स्थिति चुनौतीपूर्ण जुयाच्वंगु दु।
समाज सुधारया निंतिं गैरराजनीतिक अभियान न्ह्याकेगु थौंया आवश्यकता जुइ धुंकूगु दु। भ्रष्टाचार विरुद्ध राजनीतिक दलतय्सं यानाच्वंगु गलत ज्यायात अन्तर्राष्ट्रिय समुदाय, संगठन वा दातृ संस्थाया ध्यानाकर्षण याकेगु नं नागरिकया जिम्मेवारी खः, तर थ्व ज्या जूगु मदुनि। इमान्दार व पारदर्शी जुयाः समाजय् सकारात्मक उदाहरण क्यनेगु नागरिकया कर्तव्य खः।
थ्व देय् जिगु हे खः धइगु भावना सकसियां दुने जागृत जुइमाः। भ्रष्टाचारया गतिविधिया व्यक्तिगत रुपं विरोध याय्गु व छुं नं कथंया घुस वा गैरकानूनी गतिविधि मयाय्गु नागरिकया कर्तव्य खः। भ्रष्टाचार विरुद्धया ल्वाय्गु दीर्घकालीन प्रक्रिया खः। निरन्तर दबाव व भिंकेगु पलाःया माध्यमं जक भिंकेगु सम्भव जुइ।