राष्ट्रपति रामचन्द्र पौडेलं वसन्त श्रवण व ससुपुजा औपचारिकता जक मखु, झीगु जीवनयात न्ह्याबलें ऊर्जाशील दयेका तइगु व न्हूगु खँ मालेत प्रेरित याइगु नखः जूगु धयादीगु दु।

वसन्त पञ्चमी व ससुपुजाया लसताय् भिंतुना सन्देश बियादिसें वय्कलं विद्यानापं स्वापू व ज्ञां कायेगु कथं थुगु नख न हःपाः बिइगु भलसा कयादील। वय्कलं विद्याया द्यः ससुमांजुयात पुजा याना न्ह्यायेकेगु वसन्त पञ्चमी व ससुपुजाया लसताय् सकल नेपाःमिपिंत भिंतुना देछानादीगु दु।

ससुमांजुयात शिक्षा, ज्ञां व सङ्गीतया द्यः कथं नालाकयातःगु दु। थौंया न्हि थः मस्तयेत ब्वनेकुथि भर्ना यानाः अक्षराम्भ याकूसा ससुद्यःया कृपा दयाच्वनीगु जनविश्वास दूगु वय्कलं धयादिल। सङ्गीतकःमिपिंसं नं ससुद्यःया साधना यायेगु मू न्हि कथं वसन्त पञ्चमीयात कायेगु याः। न्हूगु ज्या न्ह्याकीपिंसं थुकुन्हु न्ह्याकेगु व इहिपाः, कयेताछायेगु थेँ जाःगु साइत स्वकाः यायेमाःगु ज्या थौंया न्हिकुन्हु यायेगु नं यानाच्वंगु दु।

थौंया न्हियात ससुद्यः बुसादँ कथं नं न्यायेकेगु याः। वसन्त ऋतु न्ह्याइगु व सुद्र्यः उत्तरायण जुयाः वनाः न्हि तःहाकः व चाः चीहाकः जुयाः लुमुसे च्वना वइगु जुया नेपाःमिया जनजीवन व प्रकृतिया स्वापूनं थुकिं क्यनी।

राष्ट्रपति पौडेलं थुगु नख न देय्या सामाजिक व सांस्कृतिक विविधताया दथुइ छवाः ल्यंका मौलिक धार्मिक तजिलजिया संरक्षण व सम्वद्र्धन यासें सकसितं ससुद्यःया कृपा जुया च्वनेमाः धकाः भिंतुना देछानादीगु दु।

Categorized in राष्ट्रिय