२०८१ फाल्गुण ६, मंगलबार

राष्ट्रपति पौडेलपाखें वसन्त श्रवण

लहनान्युज | सिल्लाथ्व पंचमी ११४५, माघ २१ सोमवाः

राष्ट्रपति रामचन्द्र पौडेलं थौं सुथय् हनुमानध्वाखा लाय्कुलिइ च्वंगु नासः चुकय् झायाः वसन्त श्रवण यानादीगु दु। उगु ज्याझ्वलय् राष्ट्रपति पौडेलं पुजारीपाखें स्वांमाः, सिन्ह व प्रसादनापं कयादिल।

नेपाः पञ्चाङ्ग निर्णायक समितिं ब्यूगु सुथःसिया ७ः५५ या भिंसाइतय् वय्कलं वसन्त श्रवण यानादीगु खः। वसन्त पञ्चमीया न्हि दँय् दसं राष्ट्रप्रमुखया कथं राष्ट्रपतिं वसन्त श्रवण यायेगु याना वयाच्वंगु खः।

वसन्त श्रवण श्रीमद्भागवत् महापुराणया बाखनय् आधारित जूगु धयातःगु दु। राष्ट्रपतियात नेपाली सेनाया छगू पुचलं सलामी देछाःगु नापं पञ्चेबाजां लसकुस याःगु खः।

ज्याझ्वलय् उपराष्ट्रपति रामसहायप्रसाद यादव, प्रधानमन्त्री केपी शर्मा ओली, प्रधानन्यायाधीश प्रकाशमान सिंह राउत, सभामुख देवराज घिमिरे व राष्ट्रिय सभाया नायः नारायणप्रसाद दाहालं नं ब्वति कयादीगु खः।

Categorized in राष्ट्रिय