ये थौंनिसें च्यान्हु तक मत मवइगु
लहनान्युज | सिल्लाथ्व पंचमी ११४५, माघ २१ सोमवाः

नेपाल विद्युत् प्राधिकरणं येँया कुलेश्वर, बानेश्वर, जोरपाटी व कीर्तिपुर वितरण केन्द्रअन्तर्गतया विद्युतीय वितरण लाइन भूमिगत यायेगु ज्याया निंतिं थनिंनिसें च्यान्हु तक विद्युत् अवरुद्ध जुइत्यंगु दु।
उगु हे फिडर अन्तर्गतया थासय् थौं सुथसिया ११ ताः इलंनिसें न्हिनसिया ४ ताः ईतक विद्युत् आपूर्ति बन्द जुइ त्यंगु नेपाल विद्युत् प्राधिकरण आयोजना व्यवस्थापन निर्देशनालयं धाःगु दु।
निर्देशनालयया कथं माघ २१ गते भत्केको पुल (चाबहिल) जःखःया लागा, २२ गते कलङ्की मालपोत जःखःया लागा, २३ गते बालकुमारी जःखःया लागा, इमाडोल व लुभु जःखःया लागा, २४ गते नैकापनिसें बलम्बु तकया लागा, २५ गते बल्खुनिसें चोभार गेट तकया लागा व २७ गते जोरपाटी फिडर अन्तर्गतया बाबा चोकनिसें क्रिकेट स्टेडियमतकया लागाय् विद्युत् अवरुद्ध जुइत्यंगु दु।
अथे हे माघ २८ गते गौशाला चुकंनिसें पुलागु बानेश्वर तकया लागा व २९ गते रातोपुलनिसें गौशाला तकया लागाय् विद्युत् अवरुद्ध जुइगु धाःगु दु। च्यान्हु तक विद्युत् आपूर्ति अवरुद्ध जुइत्यंगुलिं क्षमा फ्वंसें प्राधिकरणं मौसम प्रतिकूल जुसा ‘सटडाउन’ जुइमखु धाःगु दु।
Categorized in राष्ट्रिय