सङ्घीय संसद् (प्रतिनिधिसभा)या मुँज्या न्ह्याःगु दु। मुँज्याया आकस्मिक इलय् सांसद तय्सं थःथःगु धारणा तःगु दु।

थौंया मुँज्यां सरकारं संसदय् न्ह्यब्वःगु अध्यादेश सम्बन्धी ज्याया धलः लिकाया छ्वगु दु। थ्व स्वयां न्ह्यः उगु अध्यादेश सहलह यानाः पारित यायेगु ज्याया धलः दूगु खः। अध्यादेश लिकाःगु व संशोधित ज्याया धलः वये ल्यंदनिगु सङ्घीय संसद् सचिवालयया प्रवक्ता एकराम गिरीं धाःगु दु।

थौंया मुँज्याय् अर्थ समितिया सभापति सन्तोष चालिसें ‘सुरक्षित कारोवार (न्हापांगु संशोधन) विधेयक सम्बन्धी समितिया प्रतिवेदन, २०८१’ पेश याइगु ज्याया धलः क्वःछ्यूगु दु। आर्थिक कार्यविधि नापं वित्तीय उत्तरदायित्व (न्हापांगु संशोधन) विधेयक सम्बन्धी समितिया प्रतिवेदन’ पेश याइगु जुइ। अथेहे राज्य व्यवस्था नापं सुशासन समितिया सभापति रामहरी खतिवडां ‘भ्रष्टाचार निवारण (न्हापांगु संशोधन) विधेयकसम्बन्धी समितिया प्रतिवेदन, २०८१’ पेश याइगु ज्याया धलः दु।

मुँज्याय् प्रधानमन्त्री केपी शर्मा ओलीं ‘राष्ट्रिय प्रकृति श्रोत नापं वित्त आयोगया वार्षिक प्रतिवेदन, २०७९÷८०’ पेश याइगु ज्याया धलः दु। उपप्रधानमन्त्री नापं अर्थमन्त्री विष्णुप्रसाद पौडेलं ‘आर्थिक दँ २०८१÷०८२ या बजेट नापं ज्याझ्वः छ्यलाबुलाया अवस्थाया अर्ध वार्षिक मूल्याङ्कन प्रतिवेदन’ पेश याइ।

प्रतिनिधिसभाय् प्रमुखप्रतिपक्षी दल नेकपा (माओवादी केन्द्र)या नायः नापं पूर्वप्रधानमन्त्री पुष्पकमल दाहाल ‘प्रचण्डं’ थौैंया मुँज्यायात संबोधन याइतिनि। सरकारयापाखें स्वास्थ्य व जनसङ्ख्यामन्त्री प्रदीप पौडेलं नं मुँज्यायात संबोेधन याइगु धाःगु दु।भ्रष्टाचार व सुरक्षित कारोबारलिसे सम्बन्धित प्रतिवेदन नं सदनय् न्ह्यब्वइ।

Categorized in राष्ट्रिय