गृहमन्त्री रमेश लेखकं मतिना इहिपा याःपिं सर्लाहीया बरहथवाया नेहा रौनियार व सत्येन्द्र रामया सुरक्षा सरकारं याइगु प्रतिबद्धता यानादीगु दु।

प्रतिनिधिसभाया थौंया मुँज्याया आकस्मिक व शून्य इलय् सांसद तय्सं न्ह्यथनादीगु न्ह्यसःया लिसः बियादिसें वय्कलं नेहा व सत्येन्द्र दथुइ मतिना सम्बन्धया विषयय् थःगु ध्यानाकर्षण जूगु धयादिसें भेद्भावविरुद्धया हक छ्यलाबुला याकेत सरकार जुयाच्वंगु धयादिल।

थः स्वानाच्वनागु दल नेपाली कांग्रेस नीस्वंसांनिसें हे थीत्यः मत्यः विरुद्ध जूगु न्ह्यथनादिसें वय्कलं अन्तरजातीय इहिपाविरुद्ध थः मजूगु ध्वाथुइकादिल। “अन्तरजातीय इहिपायात कानुनं मान्यता बियातःगु दु, मन्त्रालयं थुकियात आखलय् छ्यलाबुला याइ, गृहमन्त्रीं अत्याचार जुल धायेगु कपोलकल्पित खः।

मन्त्रालयं थुगु विषययात यचुकूगु दु, पीडिततय्त सुरक्षा बिइत सरकार जुयाच्वंगु दु। नेहा व सत्येन्द्रया सुरक्षा जुइ, थुकिइ सरकार गम्भीर दु”, गृहमन्त्री लेखकं धयादिल। तथ्ययात तोडमोड यानाः समाजयात ब्वथला यायेगुपाखे मघ्वायेत व अजाःगु बुखँ सामग्री तयार मयायेत नं वय्कलं सञ्चारमाध्यम तय्त इनाप यानादिल।

Categorized in राष्ट्रिय