चिजाः जुजुं वनाच्वंगु धरहरा
आर. मानन्धर | सिल्लाथ्व नवमी ११४५, माघ २४ बिहीवाः
तःभुखाय्पतिं
दकलय् न्हापां दुनी—
धरहरा !
तःभुखाय्पतिं
दकलय् न्हापां थनी—
धरहरा !
छाय् धाःसा
धरहरा
शासकया चिं खः
षडयन्त्रया जगय्
भ्रष्टाचारया सामग्रीं
निर्माण जुयाच्वंगु दु—
धरहरा !
उकिं शासकतय्त थ्व
तसकं प्रिय जुइ
तसकं आत्मीय ताइ
उकिं हे
तःभुखाय्पतिं
मनूया छेँ त्वःताः नं
शासकतसें हथाहथासं
न्हापां थंजुइ
धरहरा निं !
धरहरा
भुखाय्या नं प्रिय जुयाच्वनी—
चाय् मल्वःगु
फय्या मयःगु
शहरं म्हमस्यूगु
केवल षडयन्त्र
व भ्रष्टाचारं हे जक
तज्जाः जुयाच्वंगुलिं हे खः
भुखाचं न्हापां
धरहरा निं थुनी
धरहरा निं क्वःथइ
शासकतसें
न्ह्याक्व हे घमण्ड याःसां
तःभुखाय् पतिकं
धरहरा
चिज्जाः जुजुं वनाच्वंगु दु
चिग्वः जुजुं वनाच्वंगु दु !
ग्व, असभ्य शासकतय्सं
चाः ला मचाः ला मस्यू ?—
कोमल कलाया देय् दथुइ
उद्दंड थनातःगु
धरहराया विदूषक आकृतिं
इमित हे न्हाय् भुइक
हिस्यानाच्वंगु दु !
