सरकारं विकास निर्माणपाखें नागरिकयात अःपुक सेवा बिइगु व आर्थिक वृद्धि हासिल यायेगु ताःतयाः न्ह्याकूगु राष्ट्रिय गौरवया आयोजनाया प्रगति सन्तोषजनक खने दयाच्वंगु मदु।

सरकारं फुक्कं कथंया स्रोत व साधन उपलब्ध याःगु जुसां नं अजाःगु आयोजनाया प्रगति अपेक्षित जुइ मफूगु खनेदु। मुक्कं २७ गू राष्ट्रिय गौरवया आयोजना मध्ये थुगु आर्थिक दँय् १९ गू आयोजनाया निंतिं ६६ अर्ब ७५ क्वःति स्वंगू लख ध्यबाः विनियोजन याःगु खः। वंगु पुस मसान्त तक मुक्कं १७ अर्ब १५ क्वःति ३२ लख ध्यबाः खर्च जूगु दु।

थुगु कथं राष्ट्रिय गौरवया आयोजनाया समीक्षा अवधिइ २५।७० प्रतिशत खर्च जूगु दु। आर्थिक दँ २०६८÷६९ या न्हापांगु अवधिइ १७ गू राष्ट्रिय गौरवया आयोजना म्हसिइकूगुलिइ नेपाः सरकारं आवश्यकता व औचित्यताया लिधंसाय् क्रमागत व न्हूगु आयोजनायात नापं स्वाःगु खः। थजाःगु आजोजनाया ल्याः तब्याकाः २७ थ्यंगुलिइ पूवने धुंकूगु व ज्या हे मन्ह्यानीगु बाहेकं आर्थिक दँ २०८१÷८२ तक थ्यंबलय् १९ गू आयोजना कार्यान्वयनय् दु।

आर्थिक दँ २०८०÷८१ सं राष्ट्रिय गौरवया आयोजनाया निंतिं ६० अर्ब ३८ क्वःति ७१ लख दां खुद बजेत विनियोजन याःगुलिइ ५४ अर्ब २४ क्वःति ८ लख दां खर्च जुयाः वित्तीय प्रगति ८९।८२ प्रतिशत व भौतिक प्रगति ५७।५० प्रतिशत जूगु अर्थ मन्त्रालयं धाःगु दु।

Categorized in राष्ट्रिय