छकलं स्वंगू संकिपा प्रदर्शनय् थनिंनिसें छकलं स्वंगू संकिपा प्रदर्शन जूगु दु।

थ्व हे झ्वलय् थनिंनिसें ‘मम्मी’, ‘जुना’ व ‘सारङ्ग’या प्रदर्शन न्ह्याःगु दु। मचा मनोविज्ञान व मित्रताया बाखं न्ह्यब्वयातःगु संकिपा ‘सारङ्ग’ यात प्रशान्त तामाङं निर्देशन यानादीगु दु। विद्यालयस नृत्य स्यनामिकथं ज्या याना च्वनादीम्ह निर्देशक तामाङं मचातय्गु बाखंयात तःधंगु पर्दाय् दुथ्याकूगुलिं उकिं सकारात्मक प्रभाव त्वःतीगु धयादिल।

“संकिपाय् छगू छेँय् जुइगु थवंथः कचवंपाखें मस्तय्त लाइगु असर, मचाइलय् स्वाकीगु मित्रता व सामाजिक उत्तरदायित्वयात संकिपाय् कःघानागु दु”, निर्देशक तामाङं धयादिल। थ्व संकिपाय् उत्पल झा, ऋचा शर्मा, आदित्य कार्की, सम्राट थापा, सुरज तमु, समीरमणि दीक्षितलिसें कलाकारतय्सं अभिनय यानादीगु दु।थनिंनिसें हे प्रदर्शन जूगु संकिपा ‘मम्मी’ न्ह्याना च्वंगु स्वयां बिस्कंगु ‘हरर साइकोलोजिकल–थ्रिलर’ विधाय् तयार जूगु निर्देशक समर निरौलां धयादिल। “मद्दिक दयेका वयाच्वंगु संकिपा स्वयां बिस्कं कुतः यानागु दु।

जिं छुं संकिपा व टेली शृङ्खलाय् ज्या यानाबलय् हे बिचाः यानागु विषययात संकिपाय् कःघानागु खः। थ्व विषय नेपाली संकिपा स्वइपिं दर्शकतय्गु निंतिं न्हूगु जुइ”, वय्कलं धयादिल। संकिपाय् प्रियङ्का कार्की, सुलक्षण भारती, दीया मास्के, समीप निरौला, आयुषी ढकाल, जेभिस श्रेष्ठ, गीत विष्ट, घनश्याम जोशीपिनिगु अभिनय यानादीगु खः।

प्रदर्शन जुयाच्वंगु स्वंगूगु संकिपा ‘जुनाः एक व्यथा’ या निर्माण मचाइहिपा व मिसा हिंसा निरुत्साहित यायेगु ताःतयाः दयेकूगु निर्देशक जीवन सेञ्चुरीं कनादिल। वय्कलं धयादिल, “संकिपाया विषय झीगु गां समाजय् खनेदूगु घटनाक्रम खः। जिमिसं क्यनागु बाखं स्वयाः भतिचा जूसां सुसूचित जुयादिल धाःसा झीपिं सफल जुइ। ई मत्यवं इहिपा जूम्ह चेलीं भोगे यायेमाःगु बाखं हे संकिपाया विषय खः।”

दीपकप्रसाद घिमिरें निर्माण यानादीगु संकिपाय् अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, अनिता बस्नेत, कमल बोहोरालिसेंया कलाकारतय्सं अभिनय यानादीगु खः।

Categorized in मनोरन्जन