राष्ट्रपति रामचन्द्र पौडेलं भ्रष्टाचारया प्रकृति व स्वरूपय् ह्यूपाः वयाच्वंगु अवस्थाय् अनुसन्धान व अभियोजन प्रक्रियायात नं आधुनिकीकरण यानायंके माःगुलिइ बः बियादीगु दु।

अख्तियार दुरूपयोग अनुसन्धान आयोगया ३४ क्वःगु स्थापना दिवसया झ्वलय् थौं थन ग्वसाः ग्वःगु विशेष समारोहयात संबोधन यानादिसें वय्कलं सुचं प्रविधिया तीव्र विकास व छ्यला बुलालिसें हिलावंगु भ्रष्टाचारया तरिका व प्रवृत्तियात ज्यंकेत आयोग सक्षम जुइमाःगु धयादिल।

राष्ट्रपति पौडेलं सुयागुं नं दबाब वा प्रभावय् मलाःसे कसूर व कसुरदार तःधं वा चीधं मधाःसे ज्या यायेत आयोग चुकेय् जुइमखु व झुके जुइमखु धइगु खँय् थः धुक्क जूगु धयादिल। भ्रष्टाचारसम्बन्धी विधेयक ताःई तक क्वमचाःगुलिं नं छुं छुं समस्या वःगु गुनासो वयाच्वंगु न्ह्यथनादिसें वय्कलं धयादिल – “भ्रष्टाचार नियन्त्रणसम्बन्धी अन्तर्राष्ट्रिय महासन्धिया नेपाः नं पक्षधर मुलुक जुगुलिं उकिइ न्ह्यथना तःगु प्रावधान कथं झीगु कानुन व संयन्त्र परिमार्जन यायेमाःगु आवश्यक जू।”

राष्ट्रपति पौडेलं सुशासन, सामाजिक न्याय व समृद्धिया अवधारणायात मूर्तरूप बिइत फुक्क कथंया भ्रष्टाचारयात छानबिन यायेगु कथं हयेमाःगु न्ह्यथनादिसें आयोगं शक्ति व पद दयेवंतुं न्ह्याम्हं कानुनी जवाफदेहीतां मुक्त जुइमखु धइगु भलसा आमनागरिकतय्के ब्वलंकेफयेकेमाः धकाः धयादिल।

वय्कलं नागरिकतय्गु जीवनस्तरय् गुणात्मक सुधार यानाः जनताया विकास व सुशासनप्रतिया उच्च आकांक्षायात पूवंकाः देय्या भिं, कल्याण व अन्तर्राष्ट्रिय छविया निंतिं सदाचार, निष्पक्षता, पारदर्शीता नापं निर्भिकतायात मूल मन्त्र दयेकाः ज्या यायेत नं सुझाः बियादिल।(रासस)

Categorized in राष्ट्रिय