थौं ‘भ्यालेन्टाइन डे’, अथे धयाःगु प्रणय दिवस । नेपाःलिसें हलिन्यंकं छम्हेस्यां मेम्हनाप मतिना कालबिल यानाः थ्व दिवस न्यायेका वयाच्वंगु दु। दँय् दसं १४ फेब्रुअरीया न्हि थुगु दिवस न्यायेकेगु याइ।

विशेष यानाः थौं या न्हि पाल्पाया ऐतिहासिक लिसें पर्यटकीय स्थल रानीमहलय् म्वःम्वः मतिनामित वनी। कालीगण्डकी खुसिया सिथय् दयेकातःगु रानीमहलयात मतिनाया चिं कथं कायेगु यानाः नं अन मतिनामित वनेगु याः।

उगु ईया जनरल खड्गशम्शेरं थः लानी ‘तेजकुमारी’ या लुमन्तिइ थन महल दयेकूगु खः। थन दँय् दसं प्रणय दिवसया न्हि मतिनामित वयाः मतिना प्वंकेगु याइ।स्थानीयया कथं थौंया न्हि कुन्हु द्वलंद्वः ल्याय्म्ह ल्यासेत थन वइ। न्हापा न्हापा मनूत रानीमहल चाःह्युवयेया निंतिं वयेगु याइगु खःसां आः वयाः युवापुस्ताया म्वःम्वः उपस्थिति जुयावयाच्वंगु स्थानीय दीपक पाण्डें धयादिल।

थन पाल्पा, रूपन्देही, स्याङ्जा, नवलपरासी, कपिलवस्तु, गुल्मीया लागापाखें मनूत वयेगु यानाच्वंगु पाण्डेया धापू दु। कालीगण्डकीया सिथय् दयेकातःगु रानीमहल जिल्ला सदरमुकाम तानसेनं १३ किलोमिटर उत्तर पतिइ लाः। थ्व रानीमहल विसं १९५० य् शिलान्यास यानाः १९५४ य् दयेकेसिधेकूगु खः।

Categorized in राष्ट्रिय