चन्द्रागिरि नगरपालिकाया प्रमुख प्रशासकीय अधिकृत हेमराज अर्याल राजपत्राङ्कित प्रथम श्रेणी (सहसचिव) पदय् सिफारिस जुयादीगुलिं वय्कःयात विशेष हनाबना याःगु दु।थ्यंमथ्यं झिंन्हय्ला प्रमुख प्रशासकीय अधिकृतया जिम्मेवारी कयादीम्ह वय्कलं मुक्कं नगरया उन्नयनय् ऐतिहासिक ज्या यायेत ताःलाकादीगु खः।

चन्द्रागिरि नगरपालिकां सोमबाः ग्वसाः ग्वगु ज्याझ्वलय् सहसचिव अर्यालयात नगरप्रमुख घनश्याम गिरीं हनादिगु खः। उगु झ्वलय् नगरप्रमुख गिरीं नगर प्रहरी गठन, जिपिएस व डिजिटल प्रणाली कार्यान्वयन, प्रसूति अस्पताल निर्माण थेंजाःगु दूरगामी महत्वया योजना कार्यान्वयनय् प्रमुख कार्यकारी अधिकृत अर्यालया योगदान महत्त्वपूर्ण जूगु खँ कनादिल।

वय्कलं धयादिल, “जिं आःतक १० म्ह प्रमुख कार्यकारी अधिकृतलिसे ज्या यायेधुनागु दु तर राजनीतिक आज्जुयात थुइकाः याकनं ज्या पूवंकेगु क्षमता प्रमुख कार्यकारी अधिकृत अर्यालयाके जक लुइका । सत्य व तथ्यय् आधारित कार्यसम्पादन यायेगु वय्कःया शैली नाला कायेबहजू।” उगु झ्वलय् सहसचिव अर्यालं राष्ट्रसेवक कर्मचारीया निंतिं चन्द्रागिरि नगरपालिकाय् ज्या यायेगु वातावरण तःजिक दुगुलिं थःगु क्षमतां फक्व नगरया उन्नयन यायेत थःम्हेसिनं ज्या याना धकाः धयादिल।

वय्कलं धयादिल, “जि ययाः व मालाः चन्द्रागिरि नगरपालिकाय् वयागु मखु, दबाब व प्रभावय् कार्यसम्पादन यायेगु बानी जिके मदु।”बिस्कं प्रसङ्गय् छ्याञ्जे अर्यालं थःम्हं किताबी सैद्धान्तिक ज्ञानस्वयां समाज व समुदाययात दुग्यंक अध्ययन यानागुलिं राजपत्राङ्कित प्रथम श्रेणीइ नां पिकायेत ताःलाःगु खः धकाः धयादिल।

सहसचिव अर्यालं थःम्हेसि नं न्ह्याकूगु भिंगु अभ्यासयात वइगु इलय् न्ह्याकायंकेत सुझाः बियादिसें ५१ गू बुँदा ‘संस्थागत स्मरण’ नं लःल्हानादिल। ज्याझ्वलय् निमित्त प्रमुख प्रशासकीय अधिकृत सुजनराज खनाल व उपप्रमुख वसन्ती श्रेष्ठलिसें नगरप्रवक्ता कृष्णप्रसाद खड्गी, प्रमुख प्रशासकीय अधिकृत अर्यालं चन्द्रागिरि नगरपालिकायात बियादीगु योगदान न्ह्याबलें लुमंकातइ धकाः धयादिल।(रासस)

Categorized in राष्ट्रिय