जाजरकोट केन्द्रविन्दु जुयाः वंगु भुखाचं प्रभावित जिल्लाय् पुनःनिर्माण न्ह्याकूगु दु। डोटीइ ६०० सिबें अप्वः लाभग्राहीतनापं सम्झौता जुइ धुंकूगु व छु न्हिया दुने अनुदान ध्यबाः बिइगु तयारी जूगु दु।

मेमेगु जिल्ला जाजरकोट व रुकुमपश्चिमय् क्षतिया विवरण मुनेज्या जुयाच्वंगु राष्ट्रिय विपद् जोखिम न्यूनीकरण नापं व्यवस्थापन प्राधिकरणया कार्यकारी प्रमुख डा भीष्मकुमार भुसालं धयादिल। डोटीइ थगुने हे क्षतिया विवरण मुंगूली उगु तथ्यांकयात पुनः परीक्षण यानाः पुनःनिर्माण न्ह्याकेगु वय्कलं धयादिल।

वय्कःया कथं डोटीइ गुद्वःया ल्याखय् लाभग्राहीत दु।जाजरकोट व रुकुमपश्चिमय् पुनःनिर्माणया निंतिं न्हापांगु चरणया विवरण मुनेज्या जुयाच्वंगु व आः पुनःनिर्माण न्ह्याइगु कार्यकारी प्रमुख भुसालं धयादिल। वय्कःया कथं पश्चिम नेपालय् भुखाचं क्षति जूगु निजी छेँतय् विस्तृत विवरण मुनेज्याय् विपद् केन्द्र, इन्जिनियरिङ अध्ययन संस्थान, त्रिभुवन विश्वविद्यालय व प्राधिकरणया दथुइ सम्झौता जुयाः ज्या न्ह्यानाच्वंगु दु।

पूवंक विवरण मुनेत राष्ट्रिय विपद् जोखिम न्यूनीकरण नापं व्यवस्थापन प्राधिकरणया उपसचिव वेदनिधि खनाल, सुदीपविक्रम भट्ट व रामबहादुर केसीनापंया पुचलं स्थलगत रुपं जाजरकोट थ्यंकाः सोमबाः न्हापांगु चरणय् ज्या याइपिं प्रविधिज्ञतय्त तालिम बियादीगु खः।

वय्कःपिंसं स्थानीय तह, सहरी विकास मन्त्रालय, राष्ट्रिय व अन्तर्राष्ट्रिय गैरसरकारी संस्थापाखें ज्या यावनेत्यंपिं इन्जिनियरतय् तालिम न्ह्याकूगु खः। रुकुम पश्चिमया निंतिं नं पुचः छ्वये धुंकूगु प्राधिकरणं धाःगु दु।

Categorized in राष्ट्रिय