थौं ७५ क्वःगु ‘राष्ट्रिय प्रजातन्त्र दिवस’ देय्या थी थी थासय् बिस्कं बिस्कं ज्याझ्वः यानाः न्यायेके त्यंगु दु।

प्रजातन्त्र दिवसया लसताय् मू ग्वसाः खलकं सैनिक मञ्च तिंख्यलय् थौं सुथय् न्यायेकूगु ज्याझ्वलय् राष्ट्रपति रामचन्द्र पौडेल झायादीगु खः। ज्याझ्वलय् देशय् प्रजातन्त्र नीस्वनेत जूगु थी थी संघर्षय् थःगु जीवन पानादीपिं ज्ञात अज्ञात सहिदपिंत श्रद्धाञ्जली देछाःगु खः।

प्रजातन्त्र दिवस समारोहयात प्रधानमन्त्री केपी शर्मा ओलीं संबोधन यानादीगु दु। सरकारं प्रजातन्त्र दिवसया लसताय् थौं सार्वजनिक बिदा बियातःगु दु। नेपाःया इतिहासय् जहानियाँ राणा शासनया अन्त्य यानाः प्रजातन्त्र वःगु गौरवशाली व ल्वमंके मफइगु दिं कथं २००७ फागुन ७ गतेयात कायेगु याः। प्रजातन्त्र दिवसया लसताय् राष्ट्रपति रामचन्द्र पौडेलं भिंतुना सन्देश पिथनादिसें देय्या सार्वभौमसत्ता जनतायाके दयेमाः धइगु मान्यतायात संघर्ष व सहिदया बलिदानं नीस्वंगु धकाः लुमंकाबियादीगु दु। (रासस)

Categorized in राष्ट्रिय