अमेरिकाया राष्ट्रपति डोनाल्ड ट्रम्पं रुस व युक्रेन युद्ध अन्त्य यायेगु शक्ति थःके दुगु खँ धयादीगु दु। मंगलवाः साउदी अरबय् अमेरिका व रुस दथुइ जूगु नापलाये ज्या लिपा ट्रम्पं युक्रेनय् जुयाच्वंगु युद्ध अन्त्य यायेगु शक्ति थःके दुगु खँ धाःगु खः। ट्रम्पं युक्रेनय् शान्ति सम्झौता यायेफइगु खँय् थःत विश्वास अप्वया वनाच्वंगु खँ धाःगु दु।

तर मंगलवाः जूगु वार्ताय् युक्रेनी पक्षयात दुमथ्याकूगु खः । निगुलिं देय्या विदेशमन्त्रीया नेतृत्वय् जूगु वार्ताय् रुस व अमेरिका दथुइ युक्रेनय् जुयाच्वंगु युद्ध अन्त्य यायेगु सहमति जूगु खः । रुसी विदेशमन्त्री सर्गेई लाभ्रोभं उकिया निंतिं निगू देसं उच्चस्तरीय वार्ता यायेगु निर्णय याःगु खँ धयादीगु दु ।रुसी पक्षय् लाभ्रोभलिसे रुसी राष्ट्रपति भ्लादिमिर पुटिनया विदेश नीतिया सल्लाहकार युरी उशाकोभ नं सहलह जूगु खः।

विदेशमन्त्री मार्को रुबियोया नेतृत्वय् दूगु अमेरिकी पुचलय् राष्ट्रिय सुरक्षा सल्लाहकार माइक वाल्ट्ज व मध्यपूर्वया निंतिं अमेरिकी विशेष दूत स्टीभ विटकफ दुगु खः । अथे हे वार्ताय् आयोजक साउदी अरबया राजकुमार व विदेशमन्त्री फैसल बिन फरहान अल साउद व राष्ट्रिय सुरक्षा सल्लाहकार मुसैद बिन मोहम्मद अल ऐवानया ब्वति दुगु खः।

२०२२ फेब्रुअरी २४ कुन्हु रुसं युक्रेनय् आक्रमण यायेवं हःताः न्ह्याःगु खः। स्वदँया युद्धय् निगुलिं देय्यात तःधंगु क्षति जूगु दु। थ्व अवधिइ रुसं म्होतिं नं २० प्रतिशत भूभाग थःगु नियन्त्रणय् काःगु दु। युक्रेनं रुसी जहाज, सैनिक सवारी साधन व छुं शहरय् नं ड्रोन आक्रमण यानाच्वंगु दु।

रुसया आक्रमणया हुनिं कम्ती नं ४० हजार युक्रेनी सीगु दु। ६८ लाख युक्रेनीत देय् त्वःतेत बाध्य जूगु दुसा ४० लाख युक्रेनीत आन्तरिक रुपं विस्थापित जूगु दु। १ करोड ४६ लाख मनूत मानवीय ग्वाहालिया आवश्यकताय् लानाच्वंगु समाचार वःगु दु।

Categorized in अन्तर्राष्ट्रिय