ईश्वमान डंगोलनाप जुगु खल्हावल्हा 

छिगू  वडाय् जुइत्यंगु स्वयम्भू महोसत्वयात कयाः छुं खँ धयादी ?

येँ महानगरपालिका १५ वडाय् लाःगु विश्व सम्पदाय् सूर्चीकृत स्वयम्भु महाचैत्य थ्वहे वडाय् ला । नेपाः दुहां वइपिं पर्यटकत थन मवइ धइगु जुइ मखु। थ्व थाय् ऐतिहासिक सम्पदा जायाच्वंगु दु। बुद्धया शान्तिभूमि जुयाच्वंगु थाय् खः । उकथं हे थन सम्यक महादान झिंनिदँय् छक्वः जुइगु याः । लिसे थन ऐतिाििसक सांस्कृतिक सम्पदा नं आपालं दु। नेपाल सम्वतया प्रवद्र्धक संखधरं फि काःगु लखतिर्थ नं थन हे दु। तान्त्रिक रुपय् व्यसः (विजेश्वरीं , शोभा भगवती, गीता देगः नं मू सम्पदा कथं संरक्षण जुयाच्वंगु दु। थ्व वडाय् छु गज्याःगु सम्पदा स्थल दु धइगु नं महोसत्व पाखे सकतिं म्हसिकेगु कुतः याय्गु जुइ ।

फागुन १० गते निसें १७ गते तक छवाः धइथें स्वयम्भू महोसत्व न्यायेकत्यनागु दु। थुलि ताःहाकःक न्ह्याइगु महोसत्वया नितिं निवाःयात गाक्क सामान वय्धुंकूगु दु। छवाः तक न्ह्याइगु महोत्सवय् ऐतिहासिक सम्पदात खनेदइ कथं फोटो पदर्शन याय्गु, सांस्कृतिक ज्याझ्वः यायेगु, अथे हे नसा त्वसा, रहनसहनया लिसे बुसां निसें सिबलय् तकया ब्वज्या जुइ । उकथ. हे निःशुल्क स्वास्थ्य शिवर याय्गु जुइ । महोत्सव जुइगु ला द हे दु झी सकलें छथाय् च्वनेगु फइगु अवस्था जुल धाःसा सकारात्मक सुझावया लिसे ज्या याय्त प्रेरणा चूलाइ धकाः महोत्सव याय्त्यनागु खः ।

महोत्सवया नारा हे ‘पुर्खाया पौरख, झीगु गौरव’ धकाः बियातःगु दु। थुकिया लिउने छु कारण दु ?

पुर्खाया थ्व सम्पत्ति, सम्पदा झीगु गौरव खः । पुर्खाया थ्व सम्पतियात ल्यंकेत व उकिया प्रचार प्रसार यायेत जिमिसं ‘पुर्खाया पौरख जिमिगु गौरव, स्वयम्भु महोत्सव २०८१’ धकाः प्रचार यानाच्वनागु खः । पुर्खाया सम्पत्ति पुर्खा ल्यंकातःगु थीथी सम्पदा दुगुलिं लिसें स्वयम्भूया जानकारी, थनया रहनसहन आर्थिक, सामाजिक, संस्कृतियात तिबः बीगु नितिं थ्व महोत्सवया ग्वसाः ग्वयाःगु खः ।

स्थानीययात आर्थिक तिबः जुइगु खँ धयादिल । थ्व गुकथं जुइ । गुकथं व्याख्या यानादी ?

स्थानीयया आर्थिक तिबः धइगु थ्व वडाय् च्वंपिं मिसातय्सं थःगु ल्हाःया सिप उगु सिपयात पित हयेगु खः । गुगु सिप महोत्सवय् वइपिसं न्याना काइ । उकथं हे थुगु वडां आर्थिक उत्पादन जुइ कथंया थीथी तालिम बीगु ज्या जुइधुंकूगु दु। मिसापिसं थःगु हे छेँय् च्वनाः दयेकातःगु सामान महोत्सवय् ब्वयेगु वा मीगु ज्या जुइ । गुकिं छुं भचा जक जूसां मिसापिसं उत्पादन याःगु सामान मियाः आर्थिक लाभ कायेफइ । थ्व महोत्सव लिपा मिसापिसं उत्पादन याःगु सामानया बजारीकरण जुइगु विश्वास जिमिसं कयागु दु।

महोत्सवय् व्यापारीक स्टलत नं दइगु खँ छिं धयादिल । गुलि स्टल तय्गु छिकपिनिगु योजना दु ?

आः तक स्टल माल धकाः वडाय् सछिगू स्वयां अप्वः निवेदन वःगु दु। मेता खँ छु धाःसा थन आपालं रेष्टुरेन्टत उकियात बन्द यायेगु खँ जुइ मखु। मेता खँ जिमिसं नसात्वसां स्वयां नं हस्तकला, वडां तालिम बिउगु बारिष्टा कफी दय्केगु, बेकरी तालिम, लाकां दय्केगु तालिम, कौशी खेती, स्वां सय्केगु आदि तालिम बियागु दु। थ्व फुक्कं तालिम काःपिसं उत्पादन याःगु महोत्सवया झ्वलय् ब्वय्गु जुइ । महोत्सवय् म्होति नं न्यय्गू घरेल उत्पादनयात प्रोत्साहन याय्गु जुइ ।

महोत्सवय् गुगु समुदायं ब्वति काइगु अनुमान यानादियागु दु ? थुगु वडाय् गुलि नं समुदाय दु फुकसित कःघाय्गु कुतः याय्गु जुइ । पर्यटन लिसे नं स्वाःगु जुयाः महोत्सवय् पर्यटकतय्त गुकथं ब्वति काय्केगु धइगु खँय् अप्वः ध्यान बियागु दु। आपाः स्वयां आपाः पर्यटन दुकयाः थनया वासिन्दाया आयआर्जनय् तिबः बीगु आज्जु कयागु दु।

छिकपिसं वंगु इलय् नं स्वयुम्भु महोत्सवया ग्वसाः ग्वयादीु खः । वंगु इलय् छु गज्याःगु अनुभव यानादिया ?

वंगु इलय् नं सुमदाययात कःघानाः थीथी ज्याझ्वः यानागु दु। न्हापांखुसी यानाबलय् उलि व्यापक मजुल । अथेजुयाः आः थ्व महोत्सवयात व्यापक दय्केगु कुतः जुयाच्वंगु दु। स्वयम्भु महोत्सव न्हापाखुसी याय्त्यनागु खः । वंगु इलय् जिमिसं युवातय्त छन्हु, विद्यालययात छन्हु, नेपाली प्रहरी व सेनायात यानाः छन्हुया ज्याझ्वः याना वयाच्वनागु खः । उगु ज्याझ्वः तकसं प्रभावकारी जुल । गुकिया कारण ‘स्वयम्भू महोसत्व’ याय्माः धइगु जिमिसं ताय् का । वंगु इलय् जिमिसं वालय् छन्हु धकाः न्हय्गू वाः तक ज्याझ्वः यानागु खः । ज्याझ्वलय् आपालं स्थानीय कलाकार, बाजं खलकं ब्वति काःगु खः । उगु इलय् जिमिके आपाः बजेट मदु। आः जिमिसं स्वय्म्भू महोत्सव न्याय्केत्यनागु दु। फुकसिया ग्वाहालि, फुकसिया ब्वति तिबलं थुगु महोत्सव उत्कृष्ट जुइ धइगु आशा जिमिसं कयागु दु।

थुगु स्वयम्भू महोत्सवया मू आर्कषक छु जुइ ? महोत्सवया मू मुख्य आर्कषण धइगु हे झी सकलें छथाय् मुनेगु खः । थन मिसा, युवा, मस्त बृद्ध फुक्कं छथाय् मुनाः सकरात्मक सन्देश बीगु खः । मेता खँ धइगु पवित्र भुमिइ ज्याझ्वः याय्त्यनागु दु। बहुजन हिताय, बहुजन सुखाएया खँयात ध्यानय् तयाः स्वयम्भुया भूमिइ त्यागया भावना विकास याय्गु खः । मू खँ धइगु सम्यक महादान याइगु थासय् झीसं ज्याझ्वः याय्त्यनागु दु। झिंनिदँय् छक्व सम्यक महादान जुइगु पवित्र भूमिइ पलाः जक तःसां नं सकारात्मक भावना उत्पन्न जुइ । सकारात्मक सोचया वकासया नितिं नं महोत्सवं तिबः बी ।

थःगु व्यष्ट इलय् नं जिमित ई बियादीगुलिं छितः आपालपं सुभाय् लिसे स्वयम्भू महोत्सव तःजिक क्वाय् मा धकाः भिन्तुना बियाच्वना । स्वयम्भु महोसत्वया लिसे वडाया विकास व समसाामायिक खँया जानकारी बीत छिगु मिडियां थाय् बिउगुलिं आपालं सुभाय् देछानाच्वना।