श्रीलंकाया हबरानाय् यात्रुवाहक रेल किसियात थकर नया खुम्ह किसि सीगु दु। दुर्घटनाय् लानाः घाःपाः जूपिं निम्ह किसिया वासः जुयाच्वंगु दु।

श्रीलंकाय् इलय् ब्यलय् रेल व किसि दथुइ थज्याःगु दुर्घटना जुइगु याः। तर बीबीसीं थ्व श्रीलंकाय् आःतकया दकलय् ग्यानापुगु दुर्घटना जूगु बुखँ पिथंगु दु। दुर्घटनाय् मानवीय क्षति मजूगु प्रतिवेदनय् न्ह्यथनातःगु दु। श्रीलंकाया वन्यजन्तु संरक्षण संगठनया कथं दँय् दसं रेल दुर्घटनाय् लानाः २० म्ह किसि सीगु यानाच्वंगु दु।

थ्व बाहेक वंगु दँय् मनू व किसिया द्वन्द्वय् १७० म्ह स्वयां अप्वः मनूतय्गु ज्यान वंगु खःसा ५०० म्ह किसिया ज्यान वंगु खः। वन कटान व प्राकृतिक श्रोतया अभावया कारणं आः किसि मानवीय क्षेत्रय् दुहां वनेत बाध्य जुयाच्वंगु दु, गुकिं यानाः रेलया ट्रयाक, बुँया जग्गा, व गामय् दुहां वनाः दुर्घटना जुइगु जुयाच्वंगु दु।

रेल दुर्घटना बाहेक आपालं किसित विद्युत प्रहार, विषाक्त नसा, शिकारया कारणं नं सीगु यानाच्वंगु दु।

Categorized in अन्तर्राष्ट्रिय