नेपाल धितोपत्र बोर्डं धितोपत्र बजारय् ब्वतिकाइपिंत ताः तयाः वित्तीय कारबाहीसम्बन्धी मार्गदर्शन पिथंगु दु। बोर्डं सम्पत्ति शुद्धीकरण (मनी लाउण्डरिङ्ग) निवारण नियमावली, २०८१ या नियम ६९ या उपनियम (३) कथं धितोपत्र बजारय् ब्वतिकाइपिनि निंतिं वित्तीय कारबाही सम्बन्धी मार्गदर्शन पिथनाःगु धाःगु दु।

उगु मार्गदर्शन कथं नेपाः सरकार, गृह मन्त्रालयया वेबसाइटय् सार्वजनिक जूगु संयुक्त राष्ट्रसंघं प्रतिबन्ध यानातःगु धलखय् दुथ्यानाःच्वंपिं व्यक्ति, पुचः बाय् सङ्गठन कारोबारय् दूगु मदूगु क्वछिइमाः। अथे हे, थ्वज्याःगु ज्याय् संलग्न व्यक्ति, पुचः बाय् सङ्गठन धितोपत्र बजारय् ब्वति कयाच्वंम्ह खःसा कारोबारया धलखय् दूगु बाय् मदूगु नियमित कथं क्वछिइगु अद्यावधिक प्रणाली नीस्वने माः धयातःगु दु।

उगु धलः कथं सुं नं सूचीकृत व्यक्ति, पुचः बाय् सङ्गठन बाय् वनापं स्वापू दूपिं मेपिं सुं व्यक्ति, पुचः बाय् सङ्गठनया छुं नं सम्पत्ति बाय् कोष थःके दूगु जुसा तुरुन्त उगु सम्पत्ति बाय् कोष रोक्का यायेमाःगु मार्गदर्शनय् न्ह्यथनातःगु दु।

धितोपत्र बजारय् ब्वति काइम्हेस्यां थःगु ज्या न्ह्याकेबले आतङ्ककारी ज्या बाय् आमविनाशया ल्वाभः निर्माण लिसें विस्तारय् वित्तीय लगानी निवारण सम्बन्धी व्यवस्थात पालना यायेमाः। आतङ्ककारी ज्या बाय् आमविनाशया ल्वाभः निर्माण लिसें विस्तारय् वित्तीय लगानी निवारणनापं स्वापू दूपिं शङ्ककास्पद व्यक्तिया सम्बन्धय् वित्तीय जानकारी इकाईसं रिपोर्टिङ यायेमाःगु व्यवस्था मार्गदर्शनय् दु।

Categorized in राष्ट्रिय