गृहमन्त्री रमेश लेखकं लोकतन्त्रया विकल्प मदु धकाः धयादीगु दु। थौं येँय् ग्वसाः ग्वगु सुदूरपश्चिम कानुन समाजया न्हापांगु अधिवेशनय् वय्कलं लोकतन्त्रया विकल्प लोकतन्त्र जक जुइगु धयादिल।

“आःया संविधानं लोकतन्त्रयात सुनिश्चित यानातःगु दु, थुकिया विकल्प मालेगु धइगु मुलुकयात सङ्कटय् लाकेगु ज्या खः, उकिं दक्व थासं संविधानय् जुइगु आक्रमणयात मग्याःसे सामना यायेमाः”, वय्कलं धयादिल। लोकतन्त्रया रक्षा, संविधानया सुरक्षा व समावेशिताया सुदृढीकरण आःया आवश्यकता जूगु गृहमन्त्री लेखकं धयादिल।

१० दँय् संविधानया अभ्यास याये धुंकाः खने दूगु बल्लाःगु व बःमलाःगु पक्षया विश्लेषण यानाः संविधान संशोधनया तयारी जुयाच्वंगु वय्कलं धयादिल । संविधान संशोधन यायेबलय् संसदीय सर्वोच्चताया खँ यायेमाःगु गृहमन्त्री लेखकं आवश्यकता क्यनादिल।

कानुन व नीतिगत सुधार सरकारया प्राथमिकता जूगु वय्कःया धापू खः। राज्यया दक्व अङ्गय् सुदूरपश्चिमय् च्वंपिं पाय्छिपिं प्रतिनिधित्व याकेत जुयाच्वनाः धइगु वय्कःया धापू खः।

Categorized in राष्ट्रिय