येँ महानगरपालिका–२२ वडाया ग्वसालय् साहित्य माध्यमं नेपालभाषाया संरक्षण व प्रवद्र्धनय् योगदान यानादीपिं न्याम्ह साहित्यकारतय्त हंगु दु।

अन्तर्राष्ट्रिय मातृभाषा रजत जयन्ती न्यायेकेगु झ्वलय् शनिबाः वडां ‘चिनाखँ वाचन व स्रष्टा हना’ ज्याझ्वः ग्वसाः ग्वःगु खः। उगु ज्याझ्वलय् बाखंच्वमिपि पुष्प चित्रकार, सुवर्णकेशरी चित्रकार, निरञ्जनरत्न शाक्य नाप कविपि नवीन चित्रकार व श्रीराम श्रेष्ठयात हंगु खः।

ज्याझ्वलय् भाषा आयोगया नायः डा गोपाल ठाकुरं भाषाय् विविधता दूगु हे नेपाःया बांलागु पक्ष जूगु धयादिल। वय्कलं न्हापा थःगु भाषं नवायेगु व च्वयेगु भरय् हे दण्डित जुइमाःगु अवस्था जूगु, आः व अवस्था मदु धयादिल। वडा २२ या अध्यक्ष व येँ महानगरपालिका शिक्षा स्वास्थ्य समितिया कजि चिनीकाजी महर्जनं नेपाः बहुभाषिक देय् खः धका धयादीगु खः।

येँ मनपाया भालाया खँ ल्ह्वनादिसें वय्कलं धयादिल, “स्थानीय सरकारया दायित्व दुने पूर्वाधार निर्माण नापनापं सामाजिक, सांस्कृतिक व भाषिक अवस्थितियात म्वाकातयेगु नं खः। थुकिया विकास व विस्तार यायेगु नं खः। थुकिइ जिमिसं कुतः यानाच्वनाःगु दु।” ज्याझ्वलय् भाषा आयोगया दुजः सुरेशकिरण मानन्धरं युनेस्कों थ्व दिवस घोषणा याये न्ह्यः नेपालभाषायात मातृभाषा कथं संरक्षण यायेगु तातुना नीन्यादँ न्ह्यव न्हापांगु खुसिइ लिजः नेपालभाषा कविता दबूपाखें न्हाप्पां बिचाः न्ह्यब्वयादीम्ह कवि नवीन चित्रकारया देनयात लुमंकादिल।

बाखंच्वमि पुष्प चित्रकार २०२२ सालय् रेडियो नेपालं नेपाल भाषाया बुखँ दिके धुंका साहित्य सम्मलेन यानाः विरोध यानादीम्ह खः। वय्कलं च्वखँ, चिनाखँ व समालोचनाय् नं च्वसा न्ह्यानादीगु दु। बाखंच्वमि सुवर्णकेशरीं च्वयादीगु ‘इल फपुइकी’ जापानी, अङ्ग्रेजी व नेपाली भाषां भाय् हिलातःगु दु। निरञ्जनरत्न शाक्यं नेपाल संवत् १०९८ य् पिहावःगु निकचा, ११०१ य् पिहावःगु ब्वलासा लिसेंया कृति पिथनादीगु खः। कवि नवीन चित्रकार भाषिक अधिकारया निंतिं नीस्वंगु मुनासःया संस्थापक जुयादी। वय्कलं नेपाल भाषाया नाटक निर्देशन नं यानादीगु दु।

अथे हे पद्मरत्न तुलाधरं च्वयादीगु ‘शिक्षक र विद्यार्थी’ नाटकय् शिक्षकया भूमिका नं म्हितादीगु दु।‘जुलुसहीन जुलुसय् जि हालाच्वना’ कविता सङ्ग्रहया च्वमि श्रीराम श्रेष्ठ न्हूगु धारया प्रगतिशील कविया कथं म्हसिका दुम्ह च्वमि खः। साहित्यय् च्वसा न्ह्याका च्वनादीम्ह श्रेष्ठया मू विधा चिनाखँ खः। साहित्यकार रमेशकाजी स्थापितं हंपिं स्रष्टापिनिगु म्हसिका न्ह्यब्वयादीगु खः। ज्याझ्वलय् नेपालभाषाया नापनापं मैथिली, राई, भोजपुरी व नेपाली भाषायापिं नीखुम्ह साहित्यकार भाजु मय्जुपिंसं थः थः भासं चिनाखँ ब्वनादीगु खःसा वयकःपिन्त वडाध्यक्ष महर्जनं  मतिनाया चिं लःल्हानादीगु खः।

Categorized in राष्ट्रिय