गृह मन्त्रालयं दलितपिंत जुइगु भेदभाव, उत्पीडन, छुवाछूतलिसेंया घटनाया अनुसन्धानय् ग्वाहालि व सहजीकरण यायेत प्रहरी प्रधान कार्यालयं ‘दलित डेस्क’ नीस्वनाः स्वापू तयेगुया निंतिं छम्ह मनू क्वःछिइत पत्राचार याःगु दु।

गृह मन्त्रालयया प्रवक्ता रामचन्द्र तिवारीं प्रहरी प्रधान कार्यालयय् डेस्क तयाः ज्या न्ह्याकेत पत्राचार यानाःगु धयादिल। वय्कलं थ्व स्वया न्ह्यः ७७ गु जिल्लाय् नीस्वना तःगु दलित डेस्कयात प्रभावकारी कथं न्ह्याकेत व व्यवस्थापन यायेत निर्देशन बियाःगु धयादिल।

“दलित समुदायया मनूतय् नापंया ब्वतिइ दलित डेस्क नीस्वनाः सामाजिक कुरीतिया कथं समाजय् दयाच्वंगु छुवा छूत व भेदभाव न्हंका छ्वयाः कानुन छ्यला बुलाय् व सुशासन अभिवृद्धिइ योगदान यायेत परिपत्र यानाःगु खः।” प्रवक्ता तिवारीं धयादिल, “डेस्कय् च्वनिम्ह प्रहरी कर्मचारीयात समन्वयात्मक व प्रभावकारी कथं डेस्क न्ह्याकेत नापं व्यवस्थापन यायेत धयागु दु।”

Categorized in राष्ट्रिय