सञ्चार नापं सूचना प्रविधिमन्त्री पृथ्वी सुब्बा गुरुङं राष्ट्रिय एकता व सामाजिक सद्भाव दयेका तयेत सामाजिक सञ्जालया सञ्चालन, छ्यलाबुला नापं नियमन यायेगु सम्बन्धय् व्यवस्थापन यायेत दयेकूगु विधेयक जरुरी जूगु धयादीगु दु।

न्यूनतम पारिश्रमिक निर्धारण समितिं थौं ‘श्रमजीवी पत्रकार ऐन कार्यान्वयन व ऐन संशोधनया सम्बन्ध’ य् ग्वसाः ग्वःगु अन्तक्र्रिया ज्याझ्वः मन्त्री गुरुङं सामाजिक सञ्जाल नियमन सम्बन्धी दयेकेत्यंगु विधेयकं छुं नं मिडिया व अनलाइन माध्यमत बन्द यायेगु मखुसे सामाजिक सञ्जालय् यःयःथे समाज व राष्ट्र विरोधी अभिव्यक्ति नियमन यायेत्यंगु खँ ध्वाथुइकादिल।

नेपाल सरकारया प्रवक्ता तकं जुयादीम्ह मन्त्री गुरुङं धौं थें ख्वया च्वंगु समाजय् सामाजिक सञ्जालय् प्वंकीगु गुलिखे अराजक अभिव्यक्ति लोकतन्त्र विरोधी जूगु न्ह्यथनादिसें आःया सरकार लोकतन्त्र व प्रेस स्वतन्त्रताया पक्षधर जूगु धयादिल।“जिमिसं विधेयकपाखें सामाजिक सञ्जाल दुरुपयोग याइपिं व लोकतन्त्रय् दख्खल बिइपिंत नियमन यायेत्यंगु खः, छुं नं मिडिया, पत्रकार व नागरिक तय्गु सः क्वतेलेगु कुतः यानागु मखु।” राष्ट्रियसभाय् सहलहया झ्वलय् दूगु उगु विधेयकय् नेपाल पत्रकार महासङ्घ व स्वापूदुपिंसं सांसद तय्त आवश्यक दफावार संशोधन यायेत सुझाः बिइ फइगु मन्त्री गुरुङया धापू खः।

नेपाल पत्रकार महासङ्घं विधेयकविरुद्ध आन्दोलन यायेगु पलेसा विधेयक जनमुखी दयेकेत दफावार सहलह याना सुझाः बिइ फइगु वय्कलं धयादिल। “पत्रकारतय्सं आन्दोलन यायेगु मखु, बरु विधेयक बालांक दयेकेत थप सुझाः बिइमाः”, वय्कलं धयादिल, “सामाजिक सञ्जालसम्बन्धी दयेकेत्यंगु विधेयक बन्देज मखु, नियमन जक खः।”

अथे हे, मन्त्री गुरुङं न्यूनतम पारिश्रमिक निर्धारण समितिया ऐन संशोधन यायेगु नापं सशक्त निकाय दयेकेगुलिइ मन्त्रालय न्ह्याबलें मंकाःज्या यायेत तयार दूगु धयादिल।ज्याझ्वलय् राष्ट्रिय सूचना आयोगया प्रमुख आयुक्त डा सुरेश आचार्यं न्यूनतम पारिश्रमिक निर्धारण समितियात आर्थिक, जनशक्ति व ऐन स्वंगुलिं पक्षपाखें धिसिलाःगु संयन्त्र दयेकेमाःगु धारणा तयादिल।

सञ्चार मन्त्रालयया सचिव राधिका अर्यालं ऐन संशोधन यायेगु व आवश्यक बजेटया व्यवस्थापन यायेत थः प्रतिबद्ध जुयाच्वना धकाः धयादिल। वय्कलं मन्त्रालयया प्राथमिकताय् पत्रकारिता ख्यः तयातःगु खँ कनादिसें समितिया नीतिगत सुधार नापं आर्थिक सुधारय् मन्त्रालय सक्रिय जुइगु धयादिल।

ज्याझ्वलय् सार्वजनिक सेवा प्रसारण संस्था (पिएसबी)या अध्यक्ष डा महेन्द्र विष्ट, नेपाल प्रेस काउन्सिलया अध्यक्ष बालकृष्ण बस्नेत, नेपाल पत्रकार महासङ्घया अध्यक्ष निर्मला शर्मा, पत्रकार बबिता बस्नेत, सामाजिक सुरक्षा कोषया कार्यकारी निर्देशक कविराज अधिकारी, न्यूनतम पारिश्रमिक निर्धारण समितिया अध्यक्ष सङ्गीता खड्कापिन्स श्रमजीवी पत्रकार व पत्रकारिताया पक्षय् धारणा तयादीगु खः।

Categorized in राष्ट्रिय