स्वक्वःगू राष्ट्रिय खिपः सालेगु (टग अफ वार) धेंधेंबल्ला कासा थ्वहे फागुन १६ गतेनिसें जुइत्यंगु दु। नेपाल डोरीतान संघया ग्वसालय् थ्वहे फागुन १६ व १७ गते उगु धेंधेंबल्ला कासा जुइत्यंगु खः। संघं सोमबाः थन पत्रकार सम्मेलन यानाः न्हय्गू हे प्रदेशया कासामि पिनिगु ब्वति दइगु यानाः धेंधेंबल्ला यायेत्यंगु धाःगु दु।

संघया नायः भवानीप्रसाद पौडेलं ख्वप सानोठिमीया एसओएस हर्मन माइनर स्कलय् उगु धेंधेंबल्ला ग्वसाः ग्वये त्यंगु धाःगु दु। वय्कःया कथं धेंधेंबलाय् मिजंपाखे न्हय्गू प्रदेश व स्वंगू विभागीय यानः १० पुचः व मिसापिनि न्यागू प्रदेश व स्वंगू विभागीय पुचः यानाः च्यागू पुचलं ब्वति कायेत्यंगु दु। मिसापि निगुलि सदूरपश्चिम व कर्णाली प्रदेशपाखें ब्वति मकाइगु धाःगु दु। मुक्कं १८ पुचः याना सच्छि व ६२ म्हेस्यां ब्वति काइगु नायः पौडेलं धयादिल।

धेंधेंबल्ला कासाय् मिजं पाखेया न्हाप लाःगु पुचलं छगू लख दां व ल्यू लाःगु पुचलं न्ययेद्वः दां सिरपा काइगु संघया अन्तर्राष्ट्रिय प्रतिनिधि आनन्दकुमार यादवं धयादिल। वय्कःया कथं मिसापिनिगु कासाय् त्याइगु पुचलं ६० द्वः व ल्यू लाइगु पुचलं ४० द्वः दां सिरपा काइगु दु।

नेपाःया छगू पुलांगु कासा जुया नं ताः ईतक लिकुना च्वंगुलिं राष्ट्रियस्तरया धेंधेंबल्ला यानाः थुकियात संरक्षण व प्रवद्र्धन यायेगु ताः तयातःगु यादवं धयादिल। धेंधेंबल्ला कासाय् ग्वसाः ग्वयेत मुक्कं ३१ लख तुइगु आयोजकं अनुमान यानातःगु दु।रासस)

Categorized in कासा