ताप्लेजुङया पाथीभरा (मुक्कुम्लुङ) लागाय् केबुलकार निर्माणया झ्वलय् ब्वलनावःगु विवाद ज्यंकेत गृह मन्त्रालयं आन्दोलनरत पक्षयात वार्ताय् सःतूगु दु।

गृह मन्त्रालयं गठित वार्ताटोलीया संयोजक सहसचिव प्रेमप्रसाद भट्टराईं थौं हाकनं आन्दोलनरत पक्षयात वार्ता व संवादय् वयेत इनाप याःगु खँ कनादिल। वय्कलं सोमबाः चान्हय् सूचं पिकयादीगु खः।

सूचनाय् थथे धयातःगु दु, “निर्माण ज्या दिकेगु व पाथीभरा लागाय् केबुलकार निर्माणया झ्वलय् आन्दोलनरत पक्षपाखें न्ह्यथंगु सामाजिक, सांस्कृतिक नापं स्थानीय समुदायया समस्या ज्यंकेत आन्दोलनरत पक्षयात गम्भीर जुयाः वार्ता नापं संवादय् वयेत थ्व वार्ता समितिं सकसित नं हार्दिक इनाप याना।”

सरकारं समस्या ज्यंकेत वंगु माघ २० य् उगु वार्ताटोली गठन याःगु खः। निकः तक च्वंगु सहलहं लिच्वः मवःगुलिं वार्ता न्ह्याःवने फूगु मदुनि। ‘नो केबुलकार’ पुचलं वार्ता यायेमखु धासें हाकनं आन्दोलन न्ह्याकूगुलिं उगु थासय् निक्वः झडप जुइधुंकूगु दु।

Categorized in राष्ट्रिय