राष्ट्रपति रामचन्द्र पौडेलं पवित्र पाशुपत क्षेत्र नेपालय् लाःगु झीगु निंतिं जक मखू सकल हिन्दूतय् निंतिं गौरवया खँ जूगु धयादीगु दु।

महाशिवरात्रि पर्व, २०८१ या लसताय् देय् दुने व विदेशय् च्वनाच्वंपिं सकल नेपाःमि दाजुकिजा व तताकेँहेपिनि सुख, शान्ति व समृद्धिया मनतुनां वय्कलं धयादिल, “नेपाः भूमिनापं भगवान महाद्यःया स्वापू थी थी वैदिक ग्रन्थय् वर्णन यानातःगु दु। पवित्र पाशुपत क्षेत्र नेपालय् लाःगु झीगु निंतिं जक मखुसे सकल हिन्दू तय्गु निंतिं नं गौरवया खँ खः।

”वय्कलं झीगु देशय् यक्व हे धार्मिक सम्प्रदाय  दुने दयाच्वंगु सनातन संस्कृतिइ शिवनापं स्वापू दूगु आस्था व विश्वास मदिक्क प्रतिविम्बित जूगु धयादिसें आराध्यदेव श्री पशुपतिनाथ व किरातेश्वर महाद्यःयात साक्षात् शिवस्वरूप तायेकाः आस्था तयावया च्वंपिं हलिन्यकंया श्रद्धालुतय् निंतिं नेपाः न्ह्याबलें आध्यात्मिक चिन्तनया केन्द्र जुया वयाच्वंगु धकाः धयादिल।

“वैदिक परम्पराय् शिवयात मू कथं संहारया शक्ति कथं कयातःसां शिवशक्तिइ सौम्य व रौद्र निगूलिं स्वरूप स्वानाच्वंगु दु, थुकिं प्रकृतिया सृजनात्मकलिसें संहारकारी शक्तियात बराबर प्रतिनिधित्व याइ”, वय्कलं धयादिल, “सौम्य शक्तिं मनूया चेतनाय् भिंगु पक्षया बोध याकाः उकियात जक ग्रहण यायेत उत्प्रेरित याइगुलिं हे ‘सत्यं शिवम् सुन्दरम्’ प्राचीन लोकोक्तिया कथं दयाच्वंगु खः।

” रौद्र शक्तिं मभिंगु ज्यां वःगु लिच्वः यात दण्डित याइ । थथे मानव जातिं प्रकृतिनापंया बांलागु मंकाः ज्यां जक थःगु प्रगतिया लँपुइ वनेमाः धइगु तथ्ययात झीगु थी थी सांस्कृतिक नखः चखः थें हे महाशिवरात्रिं नं ज्वः मदूगु कथं प्रकट यानाच्वंगु वय्कःया धापू दु। निर्जल व्रत, रात्रि जागरण, प्यंगू प्रहरया पूजा नापं शिव महिमा कीर्तन शिवरात्रि पूजाया मू ब्वः कथं तायेकी धाःसा शिवरात्रिया पालनां योग व मोक्ष निगूलिं दइ धइगु धार्मिक भलसा दयावयाच्वंगु वय्कलं धयादिल।

“महाशिवरात्रिया थुगु पवित्र लसताय् झीसं पाशुपत क्षेत्रनापं देय्या थी थी ब्वय् दयाच्वंगु सांस्कृतिक नापं धार्मिक सम्पदातय्गु पाय्छिकथं संरक्षण लिसें संवद्र्धन यायेगु प्रण यायेमाः”, वय्कलं धयादिल, “झीत दूगु धार्मिक सम्पदायात मौलिक स्वरूपय् लिपाया पुस्तातय्त लःल्हायेगु झीगु दायित्व खः।

स्वनिगःया जलाधारया कथं दूगु बागमती खुसियात यचु पिचु यानातयेगु झी सकसिगु नं दायित्व खः। राष्ट्रपति पौडेलं महाशिवरात्रि नखः, २०८१ पाखें झी सकसिगु जीवनय् आध्यात्मिक जागरणया न्हूगु जः ह्वले फयेमा धकाः भिंतुना देछानादीगु दु।

Categorized in राष्ट्रिय