मध्यपुरथिमि नगरपालिका–१ लोकन्थलीय् लाःगु अरनिको राजमार्गब्वया सुचुकुचुइ ‘देय्या निंतिं निघौ अभियान’यात साथ बिइत बागमती प्रदेशया स्वास्थ्यमन्त्री किरण थापा ल्हातय् तुफि व डस्विन ज्वनाः सतकय् वयादीगु दु।

‘देय्या निंतिं निघौ अभियान’ पाखें सच्छि व प्यंगूगु वाय् सुचुकुचु अभियानया झ्वलय् थौं सुथय् अरनिको राजमार्ग सुचुकुचु यायेगु ज्याझ्वलय् अभियन्ता टोलीलिसें मन्त्री थापा नं ल्हातय् तुफि व डस्विन ज्वनाः सुचुकुचु यानादिल। ज्याझ्वलय् मन्त्री थापां सतक सुचुकुचु यायेत स्थानीय तह व स्थानीयबासी तय्त भाला बिइमाःगु धयादिसें सतक दुर्घटनाय् लाःपिंत थत्थें उपचार यायेफइगु कथं ख्वपय् ट्रमा सेन्टर निर्माण यायेत्यंगु खँ नं कनादिल।

वय्कलं धयादिल, “अरनिको राजमार्ग ब्वय् दुर्घटना जुया हे च्वनी। पूर्वं वइगु सवारी साधन दुर्घटना जुइबलय् घाःपाः जूपिंत तप्यंक येँय् यंकीबलय् ज्यानया जोखिम जुइ, उकिं ख्वपय् हे छगू ट्रमा सेन्टरया आवश्यकता जुयाच्वंगुलिं राजमार्गय् हे न्ह्याकावयाच्वंगु सूर्यविनायक नगर अस्पतालयात आः प्रदेश सरकारं ट्रमा सेन्टर कथं विकास यायेत्यंगु दु।”

सूर्यविनायक नगर अस्पतालयात ट्रमा सेन्टरकथं स्तरोन्तति व विकास यायेत प्रदेश सरकारं आवश्यक प्रक्रिया न्ह्याकेधुंकूगु कनादिसें वय्कलं वइगु आर्थिक दँय् प्रदेश सरकारं आवश्यक बजेट विनियोजन याइ धकाः धयादिल।अभियानया प्यंगूगु चरणया स्वदायित्व बोध ज्याझ्वः व सुरक्षित राजमार्गया निंतिं ट्राफिक ज्याकुथिया मंकाःज्याय् सतक व गाडीइ सुरक्षित सतक छ्यलेगु बारे जनचेतना थनेधुंकूगु अभियन्ता नवराज काफ्लें कनादिल।

वय्कलं सच्छि व प्यंगू वाःतक अभियान न्ह्यानावयाच्वंगु कनादिसें चाँगुनारायण नगरपालिकाय् नं थ्व अभियान न्ह्यायेधुंकूगु धयादिल। वय्कलं ट्राफिकलिसे मिले जुयाः सतक दुर्घटना म्ह्वः यायेगु अभियान नं नापनापं न्ह्याकूगु खँ नं कनादिल।

Categorized in राष्ट्रिय