येँ महानगरपालिका दुने अनियमितताया घटना अप्वया वःगु दु। मेयर बलेन्द्र साहया सल्लाहकार पिनिगु अस्वभाविक व्यवहारं अनियमितताया घटना अप्वया वंगु खः।

विशेष यानाः फोहर व्यवस्थापन, सुशासन, सवारी साधन व्यवस्थापन थेंज्याःगु विषय अनियमितता अप्वया वंगु खः। महानगरया सवारी साधन छ्यलेगुलिं अत्याधिक लापरवाही, कार्य अनुमति बीगु ज्याय् अनियमितता, कार्य अनुमति मदुपिं भारतीय नागरिकतय्त रोजगारीइ तय्गु, विषयगत समितिया संयोजकयात सवारी साधनया व्यवस्था याय्गु थेंज्याःगु गम्भीर विषय दुथ्यानाच्वंगु दु। थज्याःगु घटना थीथी सञ्चार माध्यमय् पिहां वयेधुंकाः नं सरकारं कारवाही याय् फयाच्वंगु मदुनि।मेयर साहं थःगु आदेश माने मयाःम्ह प्रमुख प्रशासकीय अधिकृतयात कारवाही याय्गु सामान्य खँ जुइधुंकूगु दु।

कारवाही याय्गु जक मखु, मेयरया स्वकिय सचिवं कार्यकारी प्रमुखया ज्याकुथिइ तालं ग्वयातःगु व गाडीया ताःचा लाका यंकूगु घटना नं सार्वजनिक जूगु दु। नक्सा स्वीकृत याय्बलय्, अनलाइन प्रणाली क्यनाः सेटिङ्गय् ज्या याइ। छानविन समिति गठन यानाः नक्सा पास याय्गु ज्याय् समस्या वःगु धासें प्रतिवेदन सुचुकेगु योजना न्हिया न्हिथंया घटना जुइधुंकूगु दु। समितिया सुझाव थःम्हेसिया जक कार्यान्वयन याय्गु, मेपिं कर्मचारीपिंत मक्यनेगु ज्या तकं जुयाच्वंगु दु। तर, व हे प्रतिवेदनया आधारय् नक्सा स्वीकृति प्रक्रिया न्ह्यःने यंकेगु उगु हे प्रकियाय् ज्या याम्ह कार्यकारीयात कारवाही याय्गु सामान्य खँ जुइधुंकूगु दु।

उलि जक मखु न्हापा मेयरं कारवाही यानातःपिं स्वम्ह प्रमुख प्रशासकीय अधिकारीपिंत सरकारं छुं कारवाही याःगु मदुनि। प्रमुख प्रशासकीय अधिकृतयात छुं कारवाही मयासे मेथाय् हे सरुवा तक याय्धुंकूगु दु। अवश्य नं मेयर साहं याकःचां फुक्क कारवाही याःगु मखु। सचिवालयया दुजःपिसं चुक्ली याना मेयरयात कारवाही याय्त प्रोत्साहन यानाच्वंगु दु । उकथं हे मेयरया खँ मन्यंपिं कर्मचारीयात अनुशासनय् कारबाही यानाच्वंगु दु। तर, कारवाही जूपिं कर्मचारीया दोष धाःसा आःतक पुष्टि याय् फयाच्वंगु मदु। अनियमितताया दाग चिइकाः महानगर सुधार याय् मफयेवं सचिवालय दुजःपिसं कर्मचारीयात कारबाही याय्वं मेयर थः हे समस्याय् लाःगु दु।

आः महानगर दुने मेयरया सचिवालयया कारणं ग्याःचिकु अप्वःगु खँ अप्वः कर्मचारीतय्सं धयाच्वंगु दु। फुक्क खँय् सचिवालयया हस्तक्षेप यानाच्वंगुलिं कर्मचारीपि निराश जुयाच्वंगु दु। ज्या याय्गु मनोबल कुहां वःगु दु। ज्या याय्गु वातावरण स्यनेगु शुरु जुइ धुंकल, अले कर्मचारी निराश जुयाच्वंगु दु। मेयर साहं सुशासनय् व्यापक सुधार यानागु खँ प्रायः धाःसां नं सुधारया नामय् कार्यालय प्रमुखया ज्याकुथिइ सीसीटिभी जडान याःगु दु। सुनां छु ज्या यात ? तर मेयर साहं थःगु सचिवालयया दुजः तय्सं यानाच्वंगु बदमासीयात प्रोत्साहन बियाच्वंगु खनेदु।

नक्सा स्वीकृत याय्बलय् परामर्शदाता कम्पनीलिसे सेटिङया व्यवस्था याय्गु, सचिवालयया दुजःपाखें नियुक्त परामर्शदातायात छ्यलाः तःधंगु होटल व भवनया नक्सा स्वीकृत याय्गु प्रक्रियायात अग्रसरता काय्गु, मेमेपिं कर्मचारीतय्त ज्या याकेगु थेंज्याःगु गैरकानूनी गतिविधिया कारणं महानगर सचिवालय आतंक न्यनाच्वंगु दु। थुकियात नियन्त्रण याय्त सरकारी निकायपाखें अनुगमन याय्माःगु आवश्यकता जुयाच्वंगु दु। गल्ती याइपिं सचिवालय दुजः व बिचौलियाया भूमिका म्हितिपिं कर्मचारीयात तत्काल कारवाही याय्माःगु अवस्था दु। थ्व लिपा जक कुशासन अन्त्य जुयाः येँ मनपाय् सुशासन स्थापना जुइ।