मुक्कुमलुङय् आन्दोलन तच्वया वंगु दु। मुक्कुमलुङय् ‘नो केबलकार’ पक्षधर व प्रहरी दथुइ ल्वापु जूगु दु। उगु ल्वापुइ लानाः २४ म्ह घाःपाः जूगु दु। प्रहरीया कथं उगु ल्वापुइ लानाः झिंनिम्ह सुरक्षाकर्मी धाःपाः जूगु दुसा उलि हे प्रदर्शनकारी घाःपाः जूगु दु। घाःपाः जूपिनिगु वासः जिल्ला अस्पतालय् याकातःगु दु।

ल्वापुया झ्वलय्  प्रहरीं झिंन्याम्ह प्रदर्शनकारीतय्त ज्वंगु दु। ल्वापुया झ्वलय् प्रहरी निगू राउण्ड टियर ग्यास कय्कूगु दु। प्रदर्शनकारी तय्सं धाःसा प्रहरी अनावश्यक रुपय् हस्तक्षेप याःगु धासें उकियात कयाः विरोध याःगु दु। प्रहरी आन्दोलनकारीत च्वनाच्वंगु छेँ व होटलय् छापा मारे यानाः दाय्गुया लिसे धरपकड, तोडफोड थेंज्याःगु अमानवीय व्यवहार याःगु द्वपं बिउगु दु। आन्दोलनया दुथ्याम्ह प्रदिप मादेनया कथं प्रहरी २७ म्हेसित ज्वंगु दु। वंगु फागुन ६ गते निसें ‘नो केवलकार’ पक्षधरतय्सं मुक्कुमलुङ बचाउ अभियानया झ्वलय् पदयात्रा यानाच्वंगु खः।

उगु पद यात्राय् राष्ट्रिय मुक्ति पार्टी अध्यक्ष राजेन्द्र महतो लिसे थीथी राजनीतिक पार्टीया नेतातय्सं ब्वति काःगु खः। थ्वहे झ्वलय् जिल्ला प्रशासन कार्यालय ताप्लेजुङं निसें निषेधाज्ञा जारी याःगु दु। केबलकार दय्केगु खँय् विवाद अप्वया वनेवं जिल्ला प्रशासन कार्यालयंसुथय् निसे अनिश्चिकाल तकया नितिं निषेधाज्ञा जारी याःगु खः। प्रमुख जिल्ला अधिकारी नेत्रप्रसाद शर्मां चान्हय् सुचं जारी यानाः सदरमुकाम फुङलिङ व पाथिभरा क्षेत्रय् निषेधाज्ञा जारी याःगु खँ न्ह्यथनातःगु दु। फुङलिङ बजारय् नो केबलकार पक्ष व प्रहरी दथुइ ल्वापु जुइ धुंकाः ब्वलंगु परिस्थिति प्रतिकूल जूगुलिं निषेधाज्ञा जारी याय् माःगु खँ न्ह्यथनातःगु दु।

सुचंलय् धयातःगु दु, संवेदनीशल व प्रतिकूल परिस्थितिया कारण स्थानीय प्रशासन ऐन, २०२८ या दफा ६ (३) कथं निषेधाज्ञा जारी यानागु दु। थ्वहे झ्वलय् केबलकारया विरुद्ध न्ह्यानाच्वंगु आन्दोलन तच्वया वनेवं सरकारं वार्ताया नितिं आह्वान याःगु दु। गृह मन्त्रालयया सहसचिव प्रेमप्रसाद भट्टराईं वंगु फागुन ९ गते वार्ताया नितिं इनाप यासें विज्ञप्ति जारी याःगु खः। तर सरकारं वार्ताया नितिं आह्वान याःसां नं सम्बन्धित मनूतय्त धाःसा उकिया सुचं मथ्यंगु खँ आदिवासी नेता डेकेन्द्र सिंह थेगिमं कनादीगु दु। सरकारं वार्ताया नितिं आह्वान याःसां नं उगु पौ हे आधिकारिक खः कि मखु धइगु न्ह्यसः आन्दोलनकारीतय्सं तःगु दु।

सरकारी वार्ता पुचलं जारी याःगु विज्ञप्ति सादा भ्वंतय् च्वयातःगु व सरकारी छाप तकं मदुगुलिं यानाः उगु पौं हे गैरकानुनी जूगु खँ धाःगु दु। सरकारं जारी याइगु विज्ञप्ति वा सुचं सरकारया आधिकारिक लेटरहेड व छाप छ्यलेमाःगु खःसा उगु विज्ञप्तिइ सादा भ्वंतय् वःगुलिं आधिकारिकया न्ह्यसः ब्वलंगु खः। थ्वहे झ्वलय् वंगु शनिवाः ताप्लेजुङया मुक्कुमलुङय् जूगु प्रहरी हस्तक्षेप व धरपकडयात कयाः झिंनिगू जातीय खलः पुचः व गुंगू राजनीतिक पार्टीं मंकाः कथं विज्ञप्ति जारी यानाः विरोध याःगु दु। विज्ञप्तिइ शान्तिपूर्ण जुलुस यानाच्वंगु इलय् प्रहरीं आकाझाकां हस्तक्षेप यानाः प्रदर्शनकारीतय्त घाःपाः याय्गुया लिसे धरपकड याःगुलिं भत्सर्ना यानातःगु दु।

लिसे ज्वंपिंत तत्काल त्वःतेमाःगु व घाःपाः जूपिनिगु सरकारं निःशुल्क उपचार याय्माःगु माग नं यानातःगु दु। लिसें थीथी कथंया विरोधया ज्याझ्वः नं घोषणा याःगु दु। घोषित ज्याझ्वः कथं प्रदेशया झिंप्यंगुलिं जिल्लाय् विरोधसभा याय्गु, पत्रकार सम्मेलन याय्गु ज्याझ्वः घोषणा याःगु दु।आदिवासी नेवाः राजनीतिक अभियान नं वंगु फागुन ८ गते बसन्तपुरया महाद्यः पार्वती दबली प्लेकार्ड ब्बज्या याःगु दु। मुकुम्मलुङ्ग आन्दोनलय् राज्यं दमन याःगु विरोधय् ऐक्यबद्धता क्यनेगु कथं प्लेकार्ड ब्बज्या याःगु खः। उगु प्लेकार्ड ब्बज्या नेवाः ख्यःया थीथी मनूतय्स ब्बति काःगु दु।