प्रधानमन्त्री केपी शर्मा ओली व इटलीया राष्ट्रिय फुटबल टोलीया पूर्वकप्तान जियान लुुइजी बुफन थौं नाप लाःगु दु।

राष्ट्रिय युवा सङ्घ नेपाःया ग्वसालय् न्ह्याना च्वंगु स्वक्वःगु केपी ओली कप फुटबल च्याम्पियनसिपया समापन ज्याझ्वःया मू पाहाँ कथं नेपाः झायादीम्ह अन्तरराष्ट्रिय गोलरक्षक बुफनयात प्रधानमन्त्री ओलीं थौं सुथय् प्रधानमन्त्री निवास बालुवाटारय् नाप लानादीगु खः।

उगु ज्याझ्वलय् न्हापांम्ह मिसा राधिका शाक्य, प्रधानमन्त्रीया मुख्य सल्लाहकार विष्णुुप्रसाद रिमाल, नेपाल सरकारया मुख्यसचिव एकनारायण अर्याल, अखिल नेपाल फुटबल सङ्घया अध्यक्ष पङ्कज राई, राष्ट्रिय युवा सङ्घ नेपाःया अध्यक्ष क्षितिज थेबे, बुफनया छेँजःपिंलिसें ब्वति दूगु खः।

थ्व हे फागुन ११ गतेनिसें न्ह्याःगु उगु च्याम्पियनसिप थौं सनिलय् दशरथ रङ्गशालाय् क्वचायेके त्यंगु दु।

Categorized in कासा