येँ महानगरपालिकाया मेयरया खँय् उपमेयर सुनिता डंगोलं असन्तुष्टि
लहनान्युज | चिल्लाथ्व पंचमी ११४५, फागुन २० मंगलवाः
येँ महानगरपालिकाया प्रमुख प्रशासकीय अधिकृत नियुक्तियात कयाः मेयर बालेन साहं बिउगु अभिव्यक्तियात कयाः उपमेयर सुनिता डंगोलं असन्तुष्टि प्वकादीगु दु । उपमेयर डंगोलं छानबिन समितिया प्रतिवेदन सुचुकाः मेपिंत दोष बीगु उचित मजू धासें असन्तुष्टि प्वंकादीगु खः ।
वंगु छुं न्हिं न्ह्यः मेयर साहं प्रमुख प्रशासकीय अधिकृत छ्वयामहः धासें प्रधानमन्त्री केपी शर्मा ओली विरुद्ध सामाजिक सञ्जालय् असन्तुष्टि प्वंकूगु खः । मेयर साहं सामाजिक सञ्जालय् प्वपंकादीगु असन्तुष्टियात कयाः उपमेयर डंगोलं मेयर साहया ज्यायात कयाः कुँ खिनादीगु खः ।
उपमेयर डंगोलं मेयर साहं थम्हं हे छानबिन समितिया प्रतिवेदन सुचुकाः दोष मेपिंत बिउगु उचित मजूगु खँ धयादीगु खः। येँ महानगरपालिकाया प्रमुख प्रशासकीय अधिकृत सरोज गुरागाईंं पुलांगु बसपार्कय् दयेकाच्वंगु भवनया नक्सा प्रक्रिया पूमवंकूसे पास याःगु धासें गुरागाईंयात बिदाय् तयाः छानबिन न्ह्याकूगु खः । मेयर साहं उगु प्रतिवेदन धाःसा सार्वजनिक याःगु मदुनि ।
पुलांगु बसपार्कय् दयेकाच्वंगु भवनया नक्सा पास यायेगु नितिं मेयर साहं न्हापां हे अनुमति बियातये धुंकूगु खःसा प्रमुख प्रशासकीय अधिकृत गुरागाईं उकियात सदर यायेगु निर्णय याःगु खः । तर मेयर साहं प्रक्रिया पूमवंकूसें फाइल सदर याःगु धासें प्रमुख प्रशासकीय अधिकृत गुरागाईंयात कयाः छानबिन याःगु खः । तर छानबिनया झ्वलय् गुरागाईंया छुं नं कथंया दोष खने मदयेवं मेयर साहं उगु फाइल सुचुकेगु ज्या याःगु खः ।
उपमेयर डंगोलं थःगु प्रतिक्रिया बीगु झ्वलय् धयादिल, ‘छानबिन समितिं छु यायेगु धकाः क्वः मछिउतले केन्द्र सरकारं छ्वयाहम्ह प्रमुख प्रशासकीय अधिकृतयात दोष बीगु, कारबाही यायेगु वा गुरागाईंया पलेसा मेपिंत छाय् छ्वया महल धकाः निरन्तर द्वपं बीगु बांलाःगु ज्या मखु । थम्हं कर्तव्य पूमवंकेगु अले मेपिंत दोष बीगु पाय्छिगु खँ मखु ।’
उकथं उपमेयर डंगोल धयादीगु दु, ‘दकलय् न्हापां छानबिन समितिया प्रतिवेदन सार्वजनिक जुइमाः । छानबिन समितिया प्रतिवेदनय् वय्कःया कमजोरी खन धाःसा तुरुन्त कारबाही प्रक्रिया न्ह्याकेमाः धइगु खँय् निगू मत मदु । तर, प्रतिवेदन सार्वजनिक मयायेगु अले केन्द्रं प्रमुख प्रशासकीय अधिकृत छ्वयामहः धकाः विरोध यायेगु खँ जुइ मखु ।’
उपमेयर डंगोलं छानबिन प्रतिवेदनय् प्रमुख प्रशासकीय अधिकृत जक मखुसें षडयन्त्र याःगु खःसा उकियात कयाः निष्पक्ष छानबिन यायेमाःगु खँ नं धासें धयादिल, ‘समग्र प्रक्रियाय् छम्ह जक व्यक्तिया ब्वति दुगु खःकि मेपिं नं दु धइगु खँ सीकाः उमित नं
कारबाहीया दायराय् हयेमाः । संगठित भ्रष्टाचारया आधारय् खने दतधाःसा उकियात कयाः नं छानबिन यानाः कारबाही यायेमाः धकाः जिं न्हापां नं धयागु खः । आः नं जिगु धापू व हे खः ।’
येँ महानगरपालिकाय् प्रमुख प्रशासकीय अधिकृत मदुगुलिं यानाः अनया कर्मचारीतय्सं वंगु स्वला न्ह्यवं निसें तलब नये खनाच्वंगु मदु । प्रमुख प्रशासकीय अधिकृतं थीथी विभागय् चेक च्वयाः ध्यबा छ्वइगु खःसा वंगु स्वला न्ह्यवंनिसें ध्यबा मवनेवं तलब नकेत थाकुयाच्वंगु खः ।
थ्वहे दथुइ मेयर साहया यु ट्युबरतय्सं धाःसा येँ महानगरपालिकाया कर्मचारीया भिडियो दयेकाः सरकारया कारणं तलब नके मफुगु धकाः प्रचार यानाच्वंगु दु ।
मेखे सरकारं धाःसा दुम्ह कर्मचारीयात ज्या मयाकू धासें येँ महानगरपालिकाय् न्हूम्ह प्रशासकीय अधिकृत छ्वयेत तयार मदुगु खँ सीदुगु दु । सामान्य प्रशासक मन्त्रालयं कर्मचारीया छ्वयेगु ज्या याइगु खः । तर मन्त्रालयया सहसचिवत येँ महानगरपालिकाय् वनेत तकं इच्छुक मजुयाच्वंगु खँ सीदुगु दु । लिसे मन्त्रालयं येँ महानगरपालिकाया प्रमुख प्रशासकीय अधिकृतया बारे निर्णय मजू तले मेम्ह छ्वयेगु खँय् विमति प्वंकाच्वंगु दु।
Categorized in राष्ट्रिय
