दक्षिण अफ्रिकायात ५० रनं बूका न्युजिल्यान्ड आईसीसी च्याम्पियन्स ट्रफी २०२५ या फाइनलय् थ्यःगु दु।

म्हिगः बुधवाः पाकिस्तानया लाहोरय् जुगु कासाय् न्युजिल्यान्डं ब्यूगु ३६३ रनया लक्ष्य दक्षिण अफ्रिकां निर्धारित ५० ओभरय् ९ विकेटय् ३१२ रन जक दयके फुगु खः।

दक्षिण अफ्रिकाया डेविड मिलरं आक्रामक शतक दयकूगु खः। मिलरं ६७ बलय् १० चौका व ४ छक्का नाप अविजित १०० रन दयकूगु खः। अथेहे, रसी भान डेर डुसेनं ६९ रन, कप्तान टेम्बा बवुमां ५६ रन, आइदेन मार्करमं ३१ व र्यान रिकेलटोनं १७ रन दयकूगु खः।

न्युजिल्यान्डया मिचेल स्यान्टनरं ३ विकेट, म्याट हेनरी व ग्लेन फिलिप्सं २, माइकल ब्रासवेल व रचिन रवीन्द्रपिन्स छगु छगु विकेट काःगु खः।

टस त्याका न्हापा ब्याटिङ याःगु न्युजिल्यान्डं निर्धारित ५० ओभरय् ६ विकेटय् ३६२ रन दयकूगु खः। न्युजिल्यान्डया ओपनर रचिन रवीन्द्र व केन विलियम्सनं शतकीय इनिङ म्हितूगु खः। रवीन्द्रं १०१ बलय् १३ चौका व १ छक्कानाप १०८ रन दकयूगु खःसा विलियम्सनं ९४ बलय् १० चौका व २ छक्कानाप १०२ रन दयकूगु खः। डार्यल मिचेल व ग्लेन फिलिप्सपिन्स ४९ रन, विल योङं २१ व माइकल ब्रासवेलं १६ रन दयकूगु खः।

दक्षिण अफ्रिकाया लुंगी एन्गिडीं ३ विकेट, कगिसो रबाडां निगु विकेट विन मुल्डरं छगु विकेट काःगु खः।

Categorized in कासा