प्रधानमन्त्री केपी शर्मा ओलीं देय् दुने व विदेशय् च्वनादीपिं सकल नेपाःमितय्त फागु पुन्हिया भिंतुना देछानादीगु दु।

सामाजिक सञ्जाल फेसबुकपाखें हर्ष व उमङ्गया थूगु नखः वसन्तोत्सव व मदनोत्सवनापं जूगु धयादिसें सकल नेपाःमि दाजुकिजा व तताकेँहेपिंत भिंतुना देछानादीगु दु।

फागु पुन्हियात होली पर्वया कथं न्यायेकेगु याना च्वंगु व वसन्त ऋतुया थ्व पुन्हियात प्रकृतिया पुनर्जागरणया न्हि तायेकी धासें भिंतुना सन्देशय् प्रधानमन्त्री ओलीं शिशिरलिपा वइग वसन्त ऋतुइ स्वांत ह्वइगु व झंगतय् चिरबिर सः नं लकस यइपुसे च्वनीगु धयादीगु दु । “फागु पुन्हियात वसन्तोत्सव व मदनोत्सव नं धाइ। झीगु प्राचीन शास्त्र वेदय् तिमिलायात नुगःया द्यः धयातःगु दु।

मनय् वइगु भावनात्मक उद्वेगयात प्रकृति व पुरुष तत्व जागृत जूगु व सृष्टि सहज जूगु तायेकी। थूगु ऋतुइ फुक्क प्राणी व वनस्पति चञ्चल जुइगु विश्वास यानातःगु दु”, फेसबुकय् प्रधानमन्त्रीं च्वयादीगु दु, “हर्ष व उमङ्गया क्रीडापर्व फागुपुन्हिया सकसितं भिंतुना ! ह्याप्पी होली!

Categorized in राष्ट्रिय