फागु पून्हिंया झ्वलय् याँछें च्वंगु भीमसेन देगलय् थौं सुथंनिसें दर्शनार्थीतय्गु म्वःम्वः जूगु दु।

फागु पुन्हिया न्हु कुन्हु भीमसेन द्यःया विधिवत् कथं पुजा व दर्शन यात धाःसा आम्दानीया न्हू न्हूगु स्रोत दयावइगु नापं बनेज्या च्वन्ह्यानाः वनीगु धार्मिक मान्यता दुगुलिं भक्तजन सुथ न्हापांनिसें हे भक्तजनतय्गु म्वःम्वः जूगु खः।

थौंया न्हुकुन्हु भीमसेन देगलय् स्थानीय डाफा भजन खलः, बन्जातय्गु सङ्घ संस्था व पसः न्ह्याकाच्वंपिं बलि बियाः पुजा यायेत भीमसेन देगलय् वनेगु याइ। थौं त्वाःत्वालय् धिमेबाजा, बाँसुरीलिसें बाजा थानाः थी थी पुचः न भीमसेन देगलय् वनीगु याइ। द्यः पुजा याये धुंकाः समयबजी नयाः फागु नखः न्यायेकीगु प्रचलन दु।

स्थानीय मिसात हाकुपटासी सिनाः रङ म्हिताः त्वाःत्वालय् वनीगु परम्परा नं आःतक नं दनि। थौं सनिलय् दत्तात्रयया तचपाल भीमसेन देगःया फल्चाय् प्रदर्शनी तयातःगु सिँया प्रतीकात्मक मिजंया जननेन्द्रिययात नगर चाःहीकाः ब्रह्मायणी देगःया खुसिइ यंकाः यचुकीगु व हाकनं देगलय् तयेधुंकाः थुगु दँया फागु नखः क्वचाइ।

थ्व प्रतीकात्मक सिँया लिङ्ग कुबिइम्ह मनूया काय्मचा मदुसा लिपा वय्कःयात काय् दइ धइगु जनविश्वास दु।

Categorized in राष्ट्रिय