किपुली च्वंगु त्रिभुवन विश्वविद्यालय (त्रिवि) केन्द्रीय क्याम्पसय् स्वतन्त्र विद्यार्थी युनियन (स्ववियु) निर्वाचनया नायः पदया निंतिं १७ म्हेसिया उम्मेदवारी ब्यूगु दु।

क्याम्पसं पिकाःगु अन्तिम उम्मेदवारया धलखय् अनेरास्ववियु, नेपाल विद्यार्थी सङ्घ, अनेरास्ववियु क्रान्तिकारी व स्वतन्त्र विद्यार्थी समूहलिसें स्वतन्त्र तय्सं नायः पदया निंतिं उम्मेदवारी ब्यूगु क्याम्पस निर्वाचन अधिकृत प्राडा कृष्णप्रसाद न्यौपानें कनादिगु दु।

वय्कःया कथं अनेरास्ववियुपाखें सिद्धान्त भट्ट, नेपाल विद्यार्थी सङ्घपाखें दीपकराज जोशी, अखिल (क्रान्तिकारी)पाखें प्रवीन दाहाल, स्वतन्त्र विद्यार्थी समूहपाखें दिनेश कार्की, नेपाल क्रान्तिकारी विद्यार्थी सङ्घपाखें विलम सुवाल, नेपाली विद्यार्थी मञ्चपाखें अक्कल रानाभाट, नयाँ शक्ति विद्यार्थी युनियनपाखें नरेन्द्र सिंह महरा, स्वतन्त्र विद्यार्थी (त्रिवि)पाखें उज्जल वहादुर खड्का, स्वतन्त्र कथं पद्मा भुसाल, सनम वली व दिप्रसन केसीलिसें तय्सं उम्मेदवारी दर्ता याःगु खः। त्रिवि केन्द्रीय क्याम्पसय् ६ हजार १ सय व ४६ म्ह मतदाता दु।

थौं सनिलया ४ ता इलय्तक उम्मेदवारतय्त दावी विरोध व लितकायेगु ई क्वःछिनातःगु नापं थौं हे सनिलया ७ ता इलय् उम्मेदवारया अन्तिम नां धलः पिकाइगु ज्याया धलः दु। त्रिविं स्ववियु निर्वाचनया प्रचार प्रसारया ई फागुन २९ गते न्हिेनिसया २ ता इलंनिसें चैत २ गते चान्हय् १२ ता इलय् तक क्वःछिनातःगु दु।

स्ववियु निर्वाचन थ्व हे वइगु चैत ५ गते त्रिवि अन्तर्गतया क्याम्पसय् जुइत्यंगु दु।

Categorized in राष्ट्रिय