बलिउड अभिनेता शाहरुख खानयात १० करोड बराबरया कर खुगु मुद्दाय् राहत ब्यूगु दु। आयकर पुनरावेदन अदालतं खानया पक्षय् फैसला याःगु दु।

भारतया संचार माध्यमं आर्थिक दँ २०७१÷२०७२ य् वित्त अधिकारीं न्ह्याकूगु अनुशासनात्मक प्रक्रिया न्यायाधिकरणं खारेज याःगु बुखँ पिथंगु दु। उगु आदेशय् कलाकारं थःगु संकिपा ‘रा वन’पाखें काःगु पारिश्रमिकय् भारतय् कर मपुल धकाः न्ह्यथनातःगु दु। थ्व मुद्दा सन् २०१२÷१३ या खः, गुबलय् शाहरुखं थःगु आईटीआरय् ८३ करोड ४२ लाख रिटर्न क्यंगु खः।

अभिनेतां विवरण सुचुकूगु व पूवंक जानकारी मब्यूगु द्वपनय् आयकर विभागं पुनः छानबिन याःगु खः।आयकर विभागं मुद्दा पुनः मूल्यांकन न्ह्याकेगु कानूनी रुपं सही मजूगु नं न्यायाधिकरणं धाःगु दु। गुकिया हुनिं अभिनेता खानं थुपिं दाबी त्याकल। थ्व मुद्दा शाहरुख खानं संकिपा ‘रा वन’या निंतिं काःगु पारिश्रमिकलिसे स्वापू दुगु खः। अभिनेता व रेड चिलिज इन्टरटेनमेन्ट दथुइ जूगु सम्झौता कथं संकिपाया ७० प्रतिशत शुटिंग बेलायतय् जुइगु जूगुलिं आम्दानीया ७० प्रतिशत विदेशय् खर्च यायेगु व ल्यं दुगु भारतय् खर्च यायेगु खः।

‘रा.वन’या निंतिं अभिनेतां १० करोड तलब काःगु खः। थ्व रकम बेलायतया छगू कम्पनी मार्फत प्राप्त जूगु खः। रेड चिलिजं १० करोड मध्ये छगू करोड टिडीएस कटौती यानाः बेलायती कम्पनीयात ध्यबा पुलेगु ज्या याःगु खः। बेलायती कम्पनीं एफईयूपाखें १४० करोड कटौती यानाः शाहरुखयात ७६ करोड ब्यूगु खः।

शाहरुखं अन २७० करोड कर पुल, गुकिं थ्व आम्दानी बेलायतं वःगु क्यन। भारत सरकारं कर खुगु कथं कया मूल्यांकन अधिकारीं अनुसन्धान न्ह्याकूगु खः। थ्व भुक्तानी प्रणालीं भारतयात कर घाटा जूगु अधिकारीं तर्क याःगु दु। आयकर विवरणय् अभिनेताया विदेशी कर क्रेडिटया दाबीयात आयकर अधिकारीं अस्वीकार याःगु खः।

छगू आदेशय् न्यायाधीश सन्दीप सिंह करहेल व गिरिश अग्रवालया इजलासं शाहरुखविरुद्धया मुद्दा गैरकानूनी जूगु फैसला याःगु दु।

Categorized in मनोरन्जन