अमेरिकाया राष्ट्रपति डोनाल्ड ट्रम्पं थः युक्रेनया समकक्षी भोलोदिमिर जेलेन्स्कीलिसे नं फोनय् खँल्हाबल्हा याःगु खः। ट्रम्पं रुसी राष्ट्रपति भ्लादिमिर पुटिनलिसे खँ ल्हाये धुंकाः जेलेन्स्कीलिसे फोनं खँ ल्हाःगु खः।

इमिगु दथुइ थ्यं मथ्यं छघौ तक फोन खँल्हाबल्हा जूगु व खँल्हाबल्हा सकारात्मक जूगु बीबीसीं जानकारी ब्यूगु दु।ट्रम्पं थःगु सामाजिक संजाल प्लेटफर्मपाखें युक्रेन व रुसलिसेया फोन खँल्हाबल्हाया उद्देश्य उमिगु इनाप व आवश्यकतायात गुलि फु उलि समायोजन यायेगु व सकारात्मक युद्धविरामया कुतःपाखे ज्या न्ह्यानाच्वंगु धाःगु दु।

अथेहे, जेलेन्स्की नं ट्रम्पलिसेया खँल्हाबल्हा सकारात्मक, स्पष्ट व तसकं सार्थक जूगु प्रतिक्रिया बियादीगु दु।वय्कलं थुगुसी अमेरिकाया ग्वाहालिपाखें दिगो शान्ति कायेफइगु विश्वास प्वंकादिल। जेलेन्स्कीलिसेया खँल्हाबल्हाय् ट्रम्पं रुसी नियन्त्रित जापोरिजिया पावर प्लान्टया सम्भावित अमेरिकाया स्वामित्वया बारे चर्चा यानादीगु खः।

युरोपया दकलय् तःधंगु विद्युत केन्द्र हाकनं संचालनय् वयेत निदँ स्वयां अप्वः ई कायेफुगु व थ्व युक्रेन व युरोपियनतय् निंतिं महत्वपूर्ण जूगु नं जेलेन्स्की स्वीकार याःगु दु ।

वय्कलं रुसलिसे आंशिक युद्धविराम सम्झौताया निंतिं प्रक्रिया न्ह्यःने यंकेगु सहमति नं यानादीगु दु, तर रुसं युद्धविरामया शर्त उल्लंघन यात धाःसा युक्रेनं प्रतिशोध याइगु चेतावनी बियादीगु दु।

Categorized in अन्तर्राष्ट्रिय