माध्यमिक शिक्षा परीक्षा (एसइई) थनिनिसें न्ह्याःगु दु। राष्ट्रिय परीक्षा बोर्ड, परीक्षा नियन्त्रण ज्याकुथिया कथं देय्न्यकंया निद्वः व ७९ परीक्षा केन्द्रपाखें थौं सुथसिया ८ ताःई निसें एसइई न्ह्याःगु दु।

परीक्षा धलः कथं न्हापांगू न्हि अनिवार्य अङ्गेजी नापं संस्कृत वेदविद्याश्रमपाखे अनिवार्य संस्कृत रचना व मदरसापाखे अनिवार्य अरेबिक भाषा विषयया परीक्षा न्ह्याःगु दु।थुगुसिया माध्यमिक शिक्षा परीक्षाय् न्यागू लख १४ द्वः व ७१ विद्यार्थीतय्सं ब्वति कयाच्वंगु नं बोर्डं धाःगु दु।

थगुनेया एसइई परीक्षाय् प्यंगू लख ६४ द्वः व ७८५ म्ह विद्यार्थींतय्सं ब्वति काःगु धाःगु दु। थूगु दँया परीक्षाय् विद्यार्थीतय्या ल्याः ४९ द्वः २८६ म्ह अप्वःगु दु। परीक्षाय् १५० म्ह परीक्षाथीत दूगु केन्द्रय् छम्ह सहायक केन्द्राध्यक्ष व २० म्ह विद्यार्थी बराबर छम्ह निरीक्षक छ्यलेगु ब्ववस्था यानातःगु दु।

परीक्षाय् ७५ म्हसिबें म्ह्वः परीक्षार्थीत दूगु केन्द्रय् धाःसा सहायक केन्द्राध्यक्ष मतःगु ज्याकुथिं धाःगु दु। थौनिसें न्ह्याःगु परीक्षा चैत १९ गते क्वचाइगु दु। परीक्षा सुथसिया ८ ताःई निसें ११ ताःई तक न्ह्याइ।

Categorized in राष्ट्रिय