उपप्रधानमन्त्री नापं शहरी विकासमन्त्री प्रकाशमान सिंहं त्रिभुवन विश्वविद्यालयया क्रिकेट ख्यःया ज्या इलय् हे पूवंकेत इनाप यानादीगु दु।

रङ्गशालाया स्वकुमि च्वनीगु थाय् निर्माण व ‘फ्लड लाइट’ जडानया ज्या क्वःछिना तःगु ई दुने पूवंका दसु न्ह्यब्वयेत वय्कलं स्वापू दूपिं निर्माण व्यवसायीतय्त इनाप यानादीगु दु।“थ्व प्रधानमन्त्री नापनापं नेपाः सरकारं उच्च प्राथमिकताय् तःगु व देय्न्यकंया क्रिकेट ह्यःमिं चिउताः काःगु ज्या खः।

अथे जुयाः देय्या विकास निर्माण आयोजना इलय् हे पूवने फइ धयागु दसु न्ह्यब्वेगु यानाः ज्या यानादिसं”, उपप्रधानमन्त्री सिंहं धयादिलक्रिकेट ख्यलय् उपप्रधानमन्त्री सिंहं नापं युवा लिसें खेलकुदमन्त्री तेजुलाल चौधरीं नापं निर्माण ज्याया निरीक्षण यानादीगु खः। वंगु असार ३१ गते प्रधानमन्त्री केपी शर्मा ओली नेतृत्वया मन्त्रिपरिषद् बैठकपाखें किपूलीइ अन्तर्राष्ट्रियस्तरया क्रिकेट रङ्गशाला दयेकेगु क्वःछ्यूगु खः।

उगु ज्या पूवंकेत आः वइगु वैशाख मसान्त तक ई बियातःगु दु।स्वकुमि च्वनीगु थाय्या निर्माणया निंतिं वंगु फागुन १९ गते ठेक्का ब्यूगु खः। स्वंगू कंपनीं प्यारापिट निर्माण यायेत मंकाः कथं ज्या न्ह्याकाच्वंगु दु। अथे हे, फ्लडलाइट निर्माणया निंतिं ‘विसान ईश्वरी जेभी’ नाप फागुन २२ गते सम्झौता यानाः ज्या न्ह्याकूगु दु।

Categorized in कासा