प्रधानमन्त्री केपी शर्मा ओलीं प्रेस चौतारी नेपाःया न्हूगु नेतृत्वयात भिंतुना नापं लसहना बियादीगु दु।

प्रधानमन्त्री निवास, बालुवाटारय् थौं छगू ज्याझ्वः दथुइ प्रधानमन्त्रीनापं नेपाल कम्युनिष्ट पार्टी (एमाले)या नायः ओलीं प्रेस चौतारीया न्हूगु केन्द्रीय कमिटी सर्वमम्मत ल्यःगुलिं सकारात्मक सन्देश न्ह्यागु धयादिसें आः व्यावसायिक, वैचारिक व साङ्गठनिक ज्याय् सक्रिया जुइत न्हूगु कमिटीयात इनाप यानादिल।

नायः ओलीं चौतारीया नेतृत्व ल्ययेगु सन्दर्भय् आकांक्षी तय्सं थःत नाप लावःसां थःम्हेस्यां सुयातं छुं नं पदय् ती धकाः क्वःमछिनागु धयादिसें महाधिवेशनं सहमति यानाः नेतृत्व ल्ययेमाः धकाः जक मनंतुनागु लुमंकादिल। प्रधानमन्त्री ओलीं मखूगु खँ जक ल्हाइपिं व कतःपिंत द्वपं बिइपिंपाखें बचेजुयाः देय्यात समृद्धि व सामाजिक सद्भाव नापं छवाःया निंतिं सञ्चार ख्यःपाखें योगदान बिइमाःगु खँय् बः बियादिल।

प्रधानमन्त्रीं सामाजिक सञ्जालया बांलाक छ्यलाबुला यानाः साम्प्रादायिक, जातीय, भाषिक, क्षेत्रीय व लैङ्गिकताया नामय् सङ्गठन दुने छुं नं कथंया ‘भाइरस’ दुहां वयेके मबीगु खँय् सचेत यानादिल। थ्व हे चैत १० गतेनिसें १२ गते तक विराटनगरय् जूगु चौतारीया झिक्वःगू राष्ट्रिय महाधिवेशनपाखें गणेश पाण्डेया नेतृत्वय् न्हूगु केन्द्रीय कमिटी ल्यःगु खः।

उगु झ्वलय् चौतारीया नायः पाण्डे, पूर्वअध्यक्षपिं गणेश बस्नेत व राजेन्द्र अर्याल नापं वरिष्ठ नेता विश्वमणि सुवेदीलिसें ब्वति कयादीगु खः।

Categorized in राष्ट्रिय