प्रधानमन्त्री केपी शर्मा ओलीं सङ्क्रमणकालीन न्यायसम्बन्धी निगू आयोगया ज्यायात सफल यायेत सरकारपाखें माःगु दक्व खँय् सहजीकरण जुइगु प्रतिबद्धता प्वंकादीगु दु।

जवाफदेहीता निगरानी समिति व द्वन्द्धपीडित सङ्गठनपाखें थौं ग्वसाः ग्वःगु सङ्क्रमणकालीन न्यायसम्बन्धी राष्ट्रिय सम्मेलनयात संबोधन यानादिसें प्रधानमन्त्री ओलीं सङ्क्रमणकालीन न्यायसम्बन्धी निगू आयोगया थ्व स्वया न्ह्यःया ज्यात छाय् सफल मजुल धइगु समीक्षा यानाः वइगु इलय् ज्यायात सफल यायेत जिम्मेवार पक्ष झीपिं फुक्क न्ह्याये माःगुलिइ बः बियादिल।वय्कलं पीडित तय्त न्याय व परिपूरण बिइत सरकार सक्रिय जुयाच्वनीगु भलसा बियादिसें वंगु इलय् जूगु म्वाःगु व अनुचित हिंसायात आवं निसें अथे मजुइगु सुनिश्चितयासें शान्ति प्रक्रियायात लिच्वलय् थ्यंकेत सङ्क्रमणकालीन न्याय सम्बन्धी कानुनयात संसद् पाखें सहमतिइ पारित याकूगु लुमंकादिल।

संसद्पाखें सत्य निरुपण नापं मेलमिलाप आयोग व बेपत्ता यानातःपिं मनूतय्गु छानबिन आयोगसम्बन्धी कानुन दयेके धुंकाः उगु आयोगया पदाधिकारी नियुक्तिया निंतिं थ्व स्वया न्ह्यः गठन जूगु सिफारिस समिति सहमति मजूसे हे ई फूगुलिं सरकारं प्रमुख दलया परामर्शय् हाकनं मेगु सिफारिस समिति गठन याःगु खः।

“दक्व नेपाली जनतातय् द्वन्द्वया घाःयात ल्वःमंके मास्तिवः। हिंसाया लँपु झीसं त्वःतेधुनागु दु। आवंनिसें अजाःगु ज्या मजुइमा, पीडित तय्त न्याय बिइ फयेमाः। १८ दँ तक शान्ति प्रक्रिया पूमवंगुलिं झीत अन्तराष्ट्रियस्तरय् ख्वाः क्यने हे मछालेमाःगु स्थिति जूगु दु, उकिं आः झीसं ज्या पूवंकेत गम्भीर जुइमाः।

गम्भीर मानवअधिकारया उलङ्घन याइपिंत कारवाही जुइ ।”, प्रधानमन्त्री ओलीं धयादिल, “जनयुद्धयात आः नं उत्सव कथं न्यायेकेगु वा सार्वजनिक बिदा बियाः न्यायेकेगु यानाच्वने आवश्यक मजू । थजाःगु खं पीडिततय्त झन् पीडित यायेफु।” नेपाली कांग्रेसया सभापति नापं पूर्वप्रधानमन्त्री शेरबहादुर देउवा, नेकपा (माओवादी केन्द्र)या नायः नापं पूर्वप्रधानमन्त्री पुष्पकमल दाहाल ‘प्रचण्ड’या ब्वति दूगु ज्याझ्वलय् प्रधानमन्त्री ओलीं सङ्क्रमणकालीन न्याययात क्वचायेकेत अन्तर्राष्ट्रिय समुदायया ग्वाहालि व साथ दयाच्वनेमाःगुलिइ बः बियादिसें थुगु प्रक्रियायात मौलिक कथं ज्यंकेत नेपालं कुतः यानाच्वंगु धयादिल।

सङ्क्रमणकालीन न्यायसम्बन्धी ज्या व सरकारया छुं नं निकायया कर्मचारी चीकूगु विषय तुलनायोग्य मजूगुलिं अजाःगु अनावश्यक विषययात स्वाकाः न्ह्यब्वयामदीत तकं वय्कलं इनाप यानादिल । प्रधानमन्त्री ओलीं जनताया सङ्घर्षं वःगु सङ्घीय लोकतान्त्रिक गणतन्त्र नीस्वनेधुंकूगुलिं मुलुक लिज्याये फइमखु धकाः नं ध्वाथुइकादिल।

Categorized in राष्ट्रिय