येँ महानगरपालिका–८ पाखें बछलेश्वरी जात्राया निंतिं फल्चा व दबू निर्माण याःगु दु। पाशुपत लागाया नांजाःगु जात्रा जुयाः नं थुकिया थःगु हे फल्चा मदुगु खः।

जात्राया व्यवस्थापनयात सहज यायेत फल्चा निर्माण यानागु धकाः वडा अध्यक्ष नापं महानगरपालिकाया सम्पदा नापं पर्यटन समितिया कजि आशामान सङ्गतं जानकारी बियादिल। फल्चालिसें वडा अध्यक्ष सङ्गतं रावण पार्टीया नं उलेज्या यानादिल। फल्चा व दबू निर्माण याःगु थाय् सार्वजनिक जग्गा खः।

पशुपति क्षेत्र विकास कोषं मोही दयेकाः व्यक्तियात उपयोग याकातःगु खः। थथे निजी छ्यलाबुलाय् वयाच्वंगु सार्वजनिक सम्पत्तियात वडां कब्जामुक्त याःगु खः। थुगु थासय् ३७ न्हुं फल्चा व दबू दयेकेगु पूवंकूगु खः।सङ्गतं धयादी, “वडां फल्चा व दबू दयेके धुंकाः जात्रा यायेगु खत, गुठिं मांया मूर्ति स्थापना याकूगु खः, थुकिं लिच्छविकालीन ऐतिहासिक जात्रा नापं सम्पदाया दिगो संरक्षण व उपयोगय् योगदान जुइ।”

थ्व यायेत ३० लख ८६ हजार बजेत तूगु खः। निगू आना जमिनय् दयेकूगु फल्चा निगू तल्ला निर्माण याःगु खः। थुगु थासय् थ्व हे चैत १८ गतेतक बछलेश्वरी, बज्रेश्वरी नापं आकाश भैरव जात्रा याइ। थ्व जात्रा विसं १९३६ स्वयां न्ह्यःनिसें न्ह्यानावयाच्वंगु धाइ।

रावण लङ्का फल्चा १६ गूगु शताब्दीया संरचना धकाः धायेगु याः। फल्चा १९९० व २०७२ सालया भुखाचं जीर्ण जूगु खः। स्वगू तल्लाया फल्चा ४४ न्हुं निर्माण पूवंकूगु खः।

Categorized in राष्ट्रिय