जिल्ला प्रहरी परिसर येँपाखें तीनकुने लागाय् जूगु मानवीय व भौतिक क्षतिया घटनाय् गम्भीर ध्यानाकर्षण जूगु धाःगु दु।

पूर्व जुजु समर्थकतय्सं तीनकुने लागाय् शान्तिपूर्ण प्रदर्शन यायेत पूर्वअनुमति कयाः याःगु प्रदर्शनया झ्वलय् निषेधित लागाय् तकं वनाः निजी सम्पत्ति, अस्पताल, सञ्चारगृह, राजनीतिक दलया ज्याकुथि, व्यापारिक लागालिसें यातायातया सवारी साधन स्यंकूगु प्रहरीं धाःगु दु।

प्रहरीं मानवीय व भौतिक क्षति जूगु घटनाय् गम्भीर ध्यानाकर्षण जूगु न्ह्यः थसें क्षतिया विवरण नं पिकाःगु दु। तीनकुने घटनाय् लानाः किपू–४ य् च्वंम्ह सविन महर्जन उपचारया झ्वलय् हे त्रिभुवन विश्वविद्यालय शिक्षण अस्पतालय् मदुगु घोषणा याःगु प्रहरीं धाःगु दु। तीनकुनेय् च्वंगु मार्बल हाउसय् सुरेश रजक सीनाच्वंगु अवस्थाय् लुयावःगु प्रहरीं धाःगु दु।

उगु घटनाय् लानाः नेपाल प्रहरीया ५३ म्ह, सशस्त्र प्रहरी बलया २२ म्ह व प्रदर्शनकारीपाखे ३५ म्ह घाःपाः जूगु खः। अथे हे ९ गः सरकारी सवारी साधन, ६ गः सरकारी वा निजी धकाः सिइ मदुगु सवारी साधनय् मिँ तःगु खः।

थी थी १४ गू थासय् मिँ च्याकूगु, ९ गू संस्था स्यंकूगु व छगू थासय् लुटे तकं यात धकाः जिल्ला प्रहरी परिसर प्रहरी उपरीक्षक अपीलराज बोहरां जानकारी बियादिल।

Categorized in राष्ट्रिय