प्रधानमन्त्री केपी शर्मा ओलीं बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक) या खुक्वःगु शिखर सम्मेलनयात थौं सम्बोधन याइगु जुगु दु। वय्कःलिसे दुजः देय्या सरकार प्रमुखपिंसं सम्मेलनयात सम्बोधन याइगु ज्याझ्वः दु।

शिखर सम्मेलनया न्हापांगु ज्या धलखय् ‘बिम्स्टेक म्यारिटाइम ट्रान्सपोर्ट कोअपरेसन’य् ल्हाःचिं तइगु जूगु दु। ग्वसाः देय् थाइल्याण्डया प्रधानमन्त्री पे थोङ् शिनावात्रां लसकुस सम्बोधन याये धुंका ज्या धलः न्ह्यब्वइगु दु। व धुंका बङ्गलादेश, भुटान, भारत, म्यानमार, नेपाः व श्रीलङ्काया प्रधानमन्त्री (प्रतिनिधिमण्डलया नेता) पाखें सम्बोधन याइ। सम्बोधन लिपा ज्या धलः पारित जुइगु दुसा ग्वसाः देय्या प्रधानमन्त्री शिनावात्रां पत्रकार सम्मेलन यानादीगु ज्याझ्वः दु।

सम्मलेनय् दिवाभोजलिपा स्थानीय ई कथं सनिलया ४ ताः इलय् प्रधानमन्त्री ओली व भारतीय प्रधानमन्त्री नरेन्द्र मोदीया दथुइ नापलाइगु ज्या धलः दु। थ्व फुक्क ज्याझ्वः बैङ्ककया होटल साङ्ग्रिलाय् जुइत्यंगु खः। थाइल्याण्डया न्हापांगु औपचारिक भ्रमण पूवंका प्रधानमन्त्री ओली बिम्स्टेक शिखर सम्मेलनय् ब्वति कयादीगु खः।

बिम्स्टेक सम्मेलनलिपा प्रधानमन्त्री ओली थौं सनिलय् थाइल्याण्डय् च्वंगु नेपाली दूतावासं ग्वसाः ग्वइगु लसकुस समारोहय् ब्वति कयादी। प्रधानमन्त्री ओलीया भ्रमण दलय् न्हापांम्ह मिसा राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीया मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा युवराज खतिवडा, नेपाः सरकारया मूख्यसचिव एकनारायण अर्याल, परराष्ट्र मन्त्रालयया सचिव अमृतबहादुर राईलिसें दी।

Categorized in राष्ट्रिय