भारतीय प्रधानमन्त्री नरेन्द्र मोदीं नेपाःलिसेया सम्बन्धयात भारतं तःजिक प्राथमिकता बियाच्वंगु दु धकाः धयादीगु दु।

थाइल्याण्डया बैङ्ककय् च्वंगु होटल माडारिन ओरियन्टलय् प्रधानमन्त्री केपी शर्मा ओलीलिसे जूगु खँल्हाबल्हा फलदायी जूगु धकाः धयादिल। “जिमिसं भारत–नेपाः मित्रताया थी थी पक्षत विशेष यानाः ऊर्जा, कनेक्टिभिटी, संस्कृति व डिजिटल प्रविधि थेंजाःगु ख्यलय् सहलह याना”, सामाजिक सञ्जाल एक्सय् प्रधानमन्त्री मोदीं धयादिल।

वय्कलं थुगुसीया बिम्स्टेक शिखर सम्मेलनं वःगु छुं छुं प्रमुख सकारात्मक लिच्वः विशेष यानाः विपद् व्यवस्थापन व समुद्री यातायातया बारे नं खँल्हाबल्हा याना धकाः धयादिल।

प्रधानमन्त्री ओली व वय्कःया भारतीय समकक्षी निम्हेसिया दथुइ थ्यं मथ्यं ४५ गू मिनेट खँल्हाबल्हा जूगु खः।

Categorized in राष्ट्रिय