तःजिक २४ क्वःगु महानगर दिवस हनिगु
नृपेन्द्रलाल श्रेष्ठ | थिंलाथ्व षष्ठी ११३९ (दिसेम्वर १३ २०१८)
येँ महानगरपालिकां थौं छगु पत्रकार सम्मेलनयाना थ्वहे वइगु मंसीर २९ गते संञ्चवाः कुन्हु तःजिक २४ क्वःगु महानगर दिवस येँया बसन्तपुरया दमकल न्ह्यने सुथसिया ८ः३० ताः इलय् हने जानकारी बिइगु ज्या जुगु दु ।
येँया बसन्तपुरय् प्रधानमन्त्री केपी शर्मा ओलीया मूपाँहासुइ जुइगु उगु ज्याझ्वलय् बिशिष्ट पाँहा कथं प्रदेश न.३ या मुख्यमन्त्री डोरमणी पाण्डे व पाँहा कथं येँया झीगु क्षेत्रया प्रतिनिधि सभाया सांसद नाप प्रदेशसभाया सांसद पिनिगु उपस्थीति जुइ त्यःगु खः ।
उगु महानगर दिवसया लसताय् येँया न्हापाम्ह मेयर जनकमान श्रेष्ठयात सम्मान, उत्कृष्ट स्वंगु सामुदायीक ब्बःनेकुथियात सम्मान उत्कृष्ट करदाता सम्मान, कर्मचारी दीर्घ सेवा पदक लःल्हाइगु नाप न्यय् द्धः नगद राशी दुगु महानगरीय सुशासन पत्रकारीता सम्मान झीम्हेसित, येँया परम्परागत बाजं गुरुपिन्त सम्मान स्वरुप नीन्याद्धः तका नगद न लःल्हाइगु ज्याझ्वः तयातःगु दु धकाः थौ जुगु पत्रकार सम्मेलन पाखे येँमनपाया मेयर बिद्यासुन्दर शाक्यं जानकारी बियादीगु खः ।
थुगु महानगर दिवसया लसताय् ज्यापु महागुथि नेपाःपाखें बसन्तपुरय् सांस्कृतिक ज्याझ्वः नाप बसन्तपुरया दबुलि हनुमानढोका, टेगः, किलागः, असं, लगं, थहिति व ओण्डो त्वालय् नसाँ त्वसाँया पसः तयगु ग्वसाः दु ।
बि स २०५२ साल मंसीर २९ गते महानगर घोषण यागु स्मरणय् दँय् दँस महानगर दिवस हना वयाच्वंगु खः ।
