सञ्चार नापं सूचना प्रविधिमन्त्री व सरकारया प्रवक्ता पृथ्वी सुब्बा गुरुङं पर्यटन राजधानी पोखराय् कासाया विकास यायेत पोखराय् तःधंगु पूर्वाधार निर्माण जरुरी जूगु धयादीगु दु।

मदन भण्डारी स्पोर्टस् एकेडेमीया ग्वसालय् पोखराय् शनिबाःनिसें न्ह्याःगु केपी ओली कप’ राष्ट्रिय खुला टी–२० मिजं क्रिकेट धेंधेंबल्लाया उलेज्या यानादिसें थौं वय्कलं पोखरा कासाया केन्द्र जुइगु माक्व सम्भावना दूगुलिं पूर्वाधार निर्माणय् सरकारं प्राथमिकता बिइ धकाः धयादिल।वय्कलं पोखरा रङ्गशालादुनेया क्रिकेट ख्यलय् आवश्यक पूर्वाधार निर्माण यायेत वइगु आर्थिक दँय् सरकारयापाखें बजेट व्यवस्था यायेगु नं प्रतिबद्धता यानादिल।

“थुगु दँय् क्रिकेट ख्यःया निंतिं फक्व बजेट विनियोजन जुइ, कासा मन्त्रालयं प्रस्ताव वइ जुइ, उकिइ जिं बः बिइ”, सञ्चारमन्त्री गुरुङं धयादिल। पोखराय् क्रिकेट, फुटबल थेंजाःगु कासाया निंतिं तःधंगु पूर्वाधार निर्माण आवश्यक जूगु वय्कःया धापू खः। वय्कलं धयादिल, “पोखरा थेंजाःगु बांलाःगु थासय् अन्तरराष्ट्रियस्तरया रङ्गशाला दयेकेमाः।

कूटनीतिक हुनिं कासा पूर्वाधार महत्वपूर्ण जू। छुंछुं देय्या निंतिं पोखरा सन्तुलित थाय् नं जुइफु।”वय्कलं धेंधेंबल्लाय् ब्वति काः वइपिं कासामि, क्लब, प्रशिक्षक, रेफ्रीतय्त भिंतुना बियादिसें धेंधेंबल्लां च्वन्ह्याःपिं व क्षमतावान् कासामित ब्वलनीगु भलसा प्वंकादिल। मदन भण्डारी स्पोट्र्स एकेडेमीया ग्वसालय् पोखरा रङ्गशालाया क्रिकेट ख्यलय् न्ह्याःगु धेंधेंबल्लाय् मुक्कं १६ गू पुचःया ब्वति दूगु एकेडेमीया नायः धुव्र आचार्यं जानकारी बियादिल। धेंधेंबल्ला वइगु वैशाख ५ गतेतक न्ह्याइ । धेंधेंबल्ला त्याकूपिंत १० लख व ल्यू लाःपिंत ५ लख ध्यबाया लिसें ट्रफी, मेडल व दसिपौ बिइ।

अथे हे धेंधेंबल्लाया च्वन्ह्याःम्ह कासामियात ३० द्वः, च्वन्ह्याःम्ह बलर व ब्याटरं म्हतिं १० द्वः व ‘प्लेयर अफ द म्याचं’ ५ द्वः ध्यबा बिइ धकाः एकेडेमीं धाःगु दु। एकेडेमीया संरक्षक नं जुया च्वनादीम्ह  प्रधानमन्त्री नापं नेकपा(एमाले)या अध्यक्ष केपी शर्मा ओलीया नामं धेंधेंबल्ला याःगु खः

Categorized in कासा