राष्ट्रपति रामचन्द्र पौडेलं राम नवमी २०८१ या लसताय् देय् दुने व विदेशय् च्वना च्वंपिं सकल नेपाःमि तता केहेँ नापं दाजुकिजापिंत सुख, शान्ति लिसें समृद्धिया निंतिं भिंतुना देछानादीगु दु।

दँय् दसं चैत शुक्ल पक्षया नवमी तिथि दिं मर्यादा पुरुषोत्तम भगवान् श्रीरामचन्द्रया बुदिंया कथं ‘राम नवमी’ नखः झःझः धायेक न्यायेकीगु याना वयाच्वंगु दु। थुकुन्हु भगवान् श्रीरामया विशेष पुजा, व्रत व जपध्यान याःसा द्यःया कृपा दयाः थःगु मनंतुनागु फुक्कं ज्या पूवनी धइगु जनविश्वास दूगु राष्ट्रपति पौडेलं पितबियादीगु भिंतुना सन्देशय् न्ह्यथना तःगु दु।

सलंसः दँ न्ह्यःनिसें छ्यला बुलाय् दूगु थुजागु मौलिक नखः न झीगु प्राचीन सभ्यताया नापनापं धर्म व संस्कृतियात म्वाका तयेत ग्वाहालि जुइगु विश्वास वय्कलं प्वंकादीगु दु। रामनवमी भगवान् श्रीरामया जन्म जूगु दिं जक मखसें थ्व दिंयात सकल पृथ्वीइ अधर्मयात बुकाः धर्मया पलिस्था जूगु लसताया दिवस कथं नं कायेगु याइ।

थौंया दिं खास यानाः देय्या थी थी थाय् नापं जनकपुरया रामजानकी देगलय् झःझः धाय्क मेला जुइ। राम नवमी थेँ जाःगु सांस्कृति नापं ऐतिहासिक नखलं झीगु थी थी जातजाति, भाषाभाषी, सांस्कृतिक नापं भौगोलिक लागाया नेपाःमितय् दथुइ थःथवंय् विश्वास, सद्भाव, सहिष्णुता व ग्वाहालिया भावनायात क्वातुकाः राष्ट्रिय छवायात अझं सुदृढ यायेत ग्वाहालि जूवनीगु विश्वास यानागु दु”, राष्ट्रपति पौडेलं सन्देशय् धयादीगु दु।

नेपाःमितय् मौलिक तजिलजि व परम्पराया संरक्षण नापं प्रवद्र्धन यानाः थूगु नखः न सकल नेपाःमितय् दथुइ थःथवंय् समझदारी, दिगो शान्ति नापं दाजुकिजाया भावना अप्वयेकेत हःपाः बिइ फयेमा धकाः मनंतुना धकाः नापं वय्कलं थःगु भिंतुना सन्देशपाखें धयादीगु दु।

Categorized in राष्ट्रिय